“Ҳеч ким қонундан устун эмас”. Трамп Обамани “ҳибсга олди” (видео)

АҚШ Президенти Дональд Трамп кеча, 21 июль куни ўзининг Truth Social ижтимоий тармоғига сунъий интеллект ёрдамида яратилган, Федерал қидирув бюроси ходимлари АҚШнинг собиқ президенти Барак Обамани ҳибсга олгани акс этган видеони жойлаштирди.

Видео Обаманинг “ҳеч ким, айниқса, президент қонундан устун эмас” деган сўзлари билан бошланади. Кейин видеода бир қатор демократлар, жумладан АҚШнинг собиқ президенти Жо Байден ва Вакиллар палатасининг собиқ спикери Ненси Пелоси кўрсатилган.

Кейин ФҚБ ходимлари Трамп ва Обама бирга ўтирган Оқ уйдаги Овал кабинетга кириб, АҚШнинг собиқ президентининг қўлига кишан солади. Бу вақтда АҚШнинг амалдаги Президенти жилмайиб ўтирарди, видео фонида эса Трампнинг имзосига айланган ва митинглар чоғида ишлатадиган қўшиғи (“The Village People” гуруҳининг “YMCA” қўшиғи) янграрди. Видео қамоқхона камерасида тўқ сариқ рангли комбинезонда кўриниш берган Обама билан якунланади. Видео давомида экранда “ҳеч ким қонундан устун эмас” деган сўзлар ёзилиб туради.

Трамп бу видеони эълон қилиш орқали АҚШ Миллий разведка директори Тулси Габбарднинг Обамага қўйган айбловига муносабат билдирган кўринади. Гап шундаки, Габбард 18 июль куни “Fox News” эфирида Обама маъмурияти расмийларини, жумладан, ФҚБнинг собиқ директори Жеймс Коми ва унинг ўтмишдоши Жеймс Клапперни Россиянинг 2016 йилги президентлик сайловларида Трампга Хиллари Клинтонни мағлуб этишига ёрдам бериш учун аралашгани ҳақидаги ғояни асослаш учун разведка маълумотларини “ишлаб чиқарганлик” даъволари бўйича таъқиб қилиш учун Адлия вазирлигига сўров юборганини маълум қилганди.

Президент ҳафта охирида ўз саҳифасида Габбарднинг даъвосини 17 марта эълон қилди. Бу эса жамоатчилик муҳокама қилаётган мавзуни ўзгартиришга уринишдек туюлди. Маълумки, сўнгги пайтларда Трампнинг 2019 йил август ойида қамоқда вафот этган миллиардер педофил ва жинсий савдогар Жеффри Эпштейн билан ўтмишдаги муносабатлари кенг муҳокама қилинмоқда. Трамп маъмурияти икки ҳафта олдин Эпштейннинг “мижозлар рўйхати” мавжуд эмаслигини ва молиячи Нью-Йоркдаги қамоқхонада ўз жонига қасд қилганини эълон қилиб, шов-шувга сабаб бўлди. Бу Эпштейн қурбонлари учун адолат ва унинг ёрдамчилари жазоланишини талаб қилган Президентнинг ўз тарафдорларини ҳам ғазаблантирди.

Обама Трампнинг масхараларига ҳали жавоб бермади, бироқ амалдаги Президент Truth Social'да бу трентни давом эттириб, Обама ҳукумати аъзоларининг қамоқхонадаги сохта суратларини эълон қилди ва калифорниялик демократ сенатор Адам Шиффни ҳибсга олишга чақирди.

Эслатиб ўтамиз, олдинроқ Трамп унинг Эпштейнга ёзган мактуби ҳақида мақола ёзган WSJ газетаси эгаси ва унинг икки журналисти устидан судга шикоят қилиб, туҳмат ва обрўсига зиён етказганлик учун 20 миллиард доллар талаб қилганди.