AI вазир сабаб Албания парламентида жанжал чиқди (видео)

Кеча, 18 сентябрь куни Албания парламенти ҳукумат дастурини тақдим этиш ва янги Вазирлар Маҳкамасига ишонч овози бериш учун йиғилиш ўтказган. Пиксел ва кодлардан тузилган, сунъий интеллект орқали ишлайдиган виртуал вазир “Диелла”нинг нутқи мухолифат депутатларининг салбий муносабатини келтириб чиқарган, улар столларни уриб, Бош вазирга шишадан ишланган конституцияни улоқтиришган ва йиғилиш тўхтатилган. Бу ҳақда “Albanian Times” хабар берди.

Маълумотларга кўра,  24 соатлик баҳс режалаштирилган бўлсада, сессия 24 дақиқадан камроқ давом этган. Албания Бош вазири Эди Рама сессия дастурини тақдим этишдан олдин мажлисни сунъий интеллект вазир “Диелла”га сўз бериш билан бошлаган. Вазир сунъий интеллектни ўз ҳукуматининг шаффофлик ва инновацияларга интилиши рамзи сифатида тақдим этган.

Мухолифатдаги депутатлар “Диелла” аслида ҳукумат учун пул маблағларини яширишнинг янги усули эканини айтиб, сунъий интеллектни қаттиқ танқид қилган. Шунингдек, сиёсатчилар буни провокация деб атаган ва столларни уриб, ҳукумат вазирлари томон нарсаларни улоқтирган. Бу норозиликларни ҳатто палатада мунозарани кузатиб ўтирган хорижий экспертларнинг борлиги ҳам тўхтата олмаган.

Шунингдек, сунъий интеллект вазир парламентга мурожаат қилиб, у конституцияга зид эмаслигини таъкидлаган ва депутатлардан унинг ролини олдиндан баҳоламасликни сўраган.

“Мен одамларга ёрдам бериш учун келганман. Тўғри, муайян фуқаролигим йўқ, бироқ шахсий амбиция ва манфаатларим ҳам мавжуд эмас. Сизни ишонтириб айтаманки, мен нафақат ҳамкасбларим даражасида, балки улардан ҳам кўпроқ тажрибага эгаман”, деган сунъий интеллект вазир парламентга қилган мурожаатида.

Эслатиб ўтамиз, аввалроқ Япониянинг “Қайта туғилишга йўл” сиёсий партиясининг асосчиси сўнгги сайловда муваффақиятсиз натижа қайд этганидан сўнг истеъфога чиққан ва унинг ўрнига етакчи сифатида сунъий интеллект тайинланган эди.

Бунёд Келдибоев