АҚШ Эрон билан дастлабки келишувни имзолади

АҚШ Президенти Дональд Трамп Эрон билан урушни тўхтатишга қаратилган дастлабки келишув аллақачон имзоланганини маълум қилди. Унинг айтишича, ҳужжат тафсилотлари яқин кунларда эълон қилинади. Бу ҳақда у кеча, 15 июнь куни G7 саммити доирасида Франция Президенти Эммануэль Макрон билан учрашув чоғида сўз очди.

“Бу келишув имзоланганини мамнуният билан маълум қиламан. Битим тўлиқ имзоланди”, деган Трамп.

АҚШ расмийларининг билдиришича, Эрон билан расмий келишув Женевада имзоланиши режалаштирилган. Шундан сўнг Ҳурмуз бўғози қайта очилади ва Эрон ядро дастури бўйича техник музокаралар бошланади.

АҚШ вице-президенти Жей Ди Венснинг айтишича, меморандум тахминан бир ярим саҳифадан иборат бўлиб, умумий тамойилларни ўз ичига олади. Келишувнинг кўплаб бандлари кейинги музокаралар давомида аниқлаштирилади.

Ҳужжатга кўра, Эрон минтақада тинчлик ва барқарорликни таъминлашга, шунингдек, ядро қуролини яратмаслик бўйича текширилиши мумкин бўлган мажбуриятни олади. Санкцияларни юмшатиш ва музлатилган Эрон активларини қайтариш эса Теҳроннинг келишув шартларини бажаришига боғлиқ бўлади.

АҚШ расмийларининг маълум қилишича, дастлабки ҳужжат электрон шаклда Дональд Трамп, Жей Ди Венс ва Эрон парламенти спикери Муҳаммад Бағир Ғолибоф томонидан имзоланган.

Келишув асосида ўт очишни тўхтатиш режими яна 60 кунга узайтирилади. Шу вақт ичида томонлар якуний тинчлик шартномаси бўйича батафсил музокараларни давом эттиради.

Покистон Бош вазири Шаҳбоз Шариф аввалроқ мамлакати воситачилигида эришилган келишув барча фронтларда, жумладан Ливанда ҳам ҳарбий ҳаракатларни дарҳол тўхтатишни назарда тутишини билдирган.

Шу билан бирга, Исроил Бош вазири Биньямин Нетаньяҳу Исроил қўшинлари Ливан, Сурия ва Ғазодаги “хавфсизлик ҳудудлари”да зарур бўлган муддат давомида қолишини ва мамлакат ўзини ҳимоя қилиш ҳуқуқини сақлаб қолишини таъкидлаган.

Эрон расмийлари эса ҳарбий ҳаракатлар тўхтатилганини тасдиқлаган бўлса-да, АҚШга нисбатан чуқур ишончсизлик сақланиб қолаётганини ва келишув фақат кескинликни камайтириш йўлидаги илк қадам эканини билдирган.