АҚШ иқтисоди кунига 15 млрд доллар зарар кўриши мумкин

АҚШ ҳукумати фаолиятиниг узоқ муддатга тўхташи мамлакат иқтисодиётига таъсир кўрсата бошлади. Бу ҳақда кеча, 15 октябрь куни АҚШ Молия вазири Скотт Бессент CNBC’нинг Америкага инвестиция киритиш бўйича форумида сўз очди.

Бессентнинг фикрича, “шатдаун” бошланганидан икки ҳафта ўтгач, ҳукумат фаолиятининг тўхташи АҚШ иқтисодиётига кунига 15 миллиард доллар атрофида зарар етказиши мумкин. Шунингдек, у мўтадил демократ сенаторларни республикачиларни қўллаб-қувватлаб, ҳукумат ишини қайта тиклаш учун биргаликда овоз беришга чақирган. 

ABC News маълумотига кўра, Сенат ҳукумат ишини жорий йилнинг 21 ноябригача қайта йўлга қўйиш имконини берадиган молиялаштириш тўғрисидаги қонун лойиҳасини яна илгари сура олмаган. Бунинг учун 60 та овоз талаб этилганди. 

Эслатиб ўтамиз, жорий йилнинг 1 октябрь куни АҚШда расман “шатдаун” бошланган эди. Шу туфайли минглаб авиарейслар кечиктирилган. Рейсларнинг кечикиши ва бекор қилиниши оқибатида энг кўп зарар кўрган аэропортлар қаторида Хьюстон, Нэшвилл, Даллас, Чикагодаги О’Хара ҳамда Ньюарк аэропортлари қайд этилган.

Моҳичеҳра Қадамова