АҚШ Мадурога Россияга кетишни таклиф қилди

north_east

Трампнинг Мадурога берган муддати тугади. Энди нима бўлади?

АҚШ Венесуэла Президенти Николас Мадурога ихтиёрий равишда мамлакатни тарк этишни таклиф қилган. Бу ҳақда жорий йилнинг 30 ноябрь куни Республикачи сенатор Марквейн Маллин CNN эфирида сўз очди.

“Биз Мадурога имконият бердик. Унга у Россияга ёки бошқа исталган давлатга кетиши мумкинлигини айтдик”, дейди Маллин.

Сенатор, шунингдек, АҚШ Президенти Дональд Трамп ҳарбий операцияга мурожаат қилмаслигини айтган.

 “У аниқ айтди, биз Венесуэлага қўшин киритмаймиз. Бизнинг вазифамиз – ўз чегараларимизни ҳимоя қилиш”, дейди у.

Эслатиб ўтамиз, жорий йил ноябрь ойида “Politico” ўз манбаларга таяниб, АҚШ Мадурога ўз лавозимни тарк этиб, Россия, Туркия ёки Кубага кетиш имкониятини беришга тайёрлиги норасмий равишда билдиргани ҳақида хабар берган эди.

Шу билан бирга, Трамп атрофидаги баъзи доиралар Мадурони ҳибсга олиш ва уни АҚШга топшириш тарафдори бўлган. “The Atlantic” манбаларининг айтишича, Мадуро лавозимни тарк этиш имкониятини АҚШ унга ва унинг ҳамроҳлари учун амнистия бериши, уни ҳибсга олиш бўйича мукофотни бекор қилиши ва қочқинликда хавфсиз яшашини кафолатлаши шарти билан кўриб чиқмоқда.

Сенаторнинг расмий баёноти эса Вашингтоннинг Каракасга босимини кучайтираётган бир пайтда янгради. Трамп ҳудуддаги наркокартелларга қарши ҳарбий ҳаракатларни кенгайтирди. Сентябрдан бери АҚШ Кариб ҳавзаси ва Тинч океани шарқидаги сув транспортларига зарба бериб келмоқда. Америкалик расмийлар Southern Spear операцияси доирасида камида 21 та кема йўқ қилинганини, ҳалок бўлганлар сони эса 83 га етганини билдирган. Вашингтон операция мақсадларини “хорижий террор ташкилотлари” билан солиштиради ва уларни “Ал-Қоида” билан тенглаштиради. Каракас эса буни “колониал таҳдид” ва “нотўғри агрессия” дея таърифламоқда.

Қайд этиш жоиз, агар Мадуро ҳақиқатан ҳам Россияга кўчишга қарор қилса, у сўнгги ўн йилликда Россияда бошпана олган учинчи хорижий етакчи бўлади. 2014 йилда мамлакатда собиқ Украина президенти Виктор Янукович яшашни бошлаган. 2024 йил охирида Сурия собиқ президенти Башар Асад ҳам Москвага кўчиб борган. Манбаларга кўра, у Москва-Сити ҳудудида яшаётган бўлиши мумкин.