Андижонда эркакни “шантаж” қилиб, 20 минг доллар олмоқчи бўлган аёллар ушланди (видео)

Андижон вилоятида 24 ёшли эркакни “шантаж” қилиш билан қўрқитган аёллар ушланди. Бу ҳақда вилоят Ички ишлар бошқармаси хабар берди.

Маълум бўлишича, 2001 йилда туғилган аёл ўзига аввалдан таниш бўлган Тошкент шаҳрида яшовчи 1989 йилда туғилган аёл билан олдиндан жиноий тил бириктирган. Улардан бири TikTok ижтимоий тармоғи орқали Андижон туманида яшовчи 2002 йилда туғилган эркак билан танишиб ишқий муносабат ўрнатган.

Шундан сўнг жабрланувчининг шахсига оид фотосуратлар устига турли уятли ва ҳақоратли сўзлар ёзиб, ушбу материалларни ўчириб ташлаш эвазига жабрланувчидан жами 20 минг АҚШ доллар пул талаб қилган. 

Тезкор тадбир давомида гумонланувчилар келишилган маблағнинг бир қисмини 7000 АҚШ долларини банк пластик картасига ўтказиб олаётган пайтда тезкор тадбир иштирокчилари томонидан ашёвий далиллар билан қўлга олинган.

Мазкур ҳолат юзасидан Жиноят кодексининг 165-моддаси (товламачилик) 3-қисми “а” банди билан жиноят иши қўзғатилиб, тергов ҳаракатлари бошланган.

Эслатиб ўтамиз, аввалроқ Сурхондарё вилоятининг Денов туманида аввалдан ишқий муносабатда бўлган эркакнинг видеоларини тарқатиб юбориш билан қўрқитган аёл ушлангани ҳақида хабар берилганди.