Андрес Иньеста фирибгарликда гумон қилинмоқда

Испаниянинг “Барселона” жамоаси собиқ афсонаси Андрес Иньеста Перу прокуратураси томонидан фирибгарлик иши доирасида тергов остига олинди. Бу ҳақда “El Espanol” нашри хабар берди.

Манбага кўра, испаниялик собиқ ярим ҳимоячи ўзига тегишли Never Say Never (NSN) компанияси ва унинг Жанубий Америкадаги шўба корхонаси орқали бир нечта перулик инвесторларга 600 минг доллардан ортиқ зарар етказган фирибгарлик схемасида гумон қилинмоқда.

Тергов материалларига кўра, Жанубий Америкадаги шўба корхона спорт ва маданий тадбирларни ташкил этиш мақсадида катта сармоя жалб қилган, бироқ ушбу лойиҳаларнинг аксарияти амалга ошмаган. Эълон қилинган тадбирлар орасида Перу ва Испания ўртасидаги афсонавий ўйин ҳамда К-поп фестивали бўлиб, улар режалаштирилганига қарамай, ўтказилмаган.

Прокуратура маълумотларига кўра, Иньестанинг жаҳон миқёсидаги обрў-эътибори маблағ жалб қилиш ва маҳаллий ҳамкорларни ишонтириш учун ишлатилган. 2023 йил апрель ойида ташкил этилган NSN Жанубий Америка компанияси кенг ҳудудий кенгайиш стратегиясини йўлга қўйган бўлса-да, амалда фақат битта тадбир ўтказилган. Бу эса компаниянинг 2024 йил июнида банкрот бўлишига олиб келган.

Перу ҳукумати компанияни олинган маблағлардан фойдаланиш бўйича молиявий ҳисобот тақдим этмаганликда ҳам айбламоқда. Компания эгаси Андрес Иньеста ҳозирча бу айбловларга расман изоҳ бермаган.

Эслатиб ўтамиз, аввалроқ биатлон бўйича 10 карра жаҳон чемпиони – франциялик спортчи Жюлья Симон фирибгарлик айбдор деб топилиб, уч ойлик шартли қамоқ жазоси ҳамда 15 минг евро жаримага тортилган эди.