Австралия мадҳия куйлашдан бош тортган эронликларга виза берди

Австралия ҳукумати Эрон миллий терма жамоасининг олти нафар аёл футболчисига гуманитар визалар берилганини тасдиқлади. Улар Осиё кубогидаги биринчи ўйин олдидан Ислом Республикасининг миллий мадҳиясини куйлашдан бош тортгани сабабли ватанга қайтса, хавф остида қолиши мумкинлиги айтилмоқда. Бу ҳақда BBC хабар берди.

Австралия Иммиграция вазири Тони Берк футболчилар Австралия полицияси томонидан “хавфсиз жойга” олиб кетилганини билдирди. Унинг сўзларига кўра, жамоанинг бошқа аъзоларига ҳам мамлакатда қолиш имконияти борлиги айтилган.

Жорий йилнинг 9 март куни эрталаб Австралия ОАВлари беш нафар футболчи меҳмонхонадан чиқиб кетгани, полицияга мурожаат қилгани ва ҳозирда хавфсиз жойда экани ҳақида хабар берган. Кейинроқ яна бир футболчи ва жамоа ходими ҳам Эронга қайтишдан бош тортгани маълум қилинган. Бироқ кейинчалик улардан бири фикрини ўзгартирган.

Вазир Беркнинг айтишича, бу аёл ўйинчилардан бири жамоадошлари билан суҳбатдан кейин қарорини ўзгартириб, қайтишга рози бўлган. Унинг таъкидлашича, Австралияда одамлар қарорини ўзгартириш ҳуқуқига эга. Аммо шу суҳбатдан кейин Эрон элчихонаси қолишга қарор қилган футболчиларнинг қаердалигини билиб олган. Шу сабабли вазир дарҳол уларни бошқа хавфсиз жойга кўчиришни буюрган.

Жамоанинг қолган аъзолари эса кеча, 10 март куни кечқурун Австралиядан чиқиб кетган. Улар Осиё кубогидан чиқиб кетганидан икки кун ўтгач мамлакатни тарк этган.

Беркнинг айтишича, Сидней аэропортида ҳам жамоа аъзоларига яна бир бор Австралияда қолиш имконияти таклиф қилинган. Полиция уларни кузатувчилардан ажратиб, таржимон орқали ҳукумат вакиллари билан алоҳида гаплашиш имконини берган. Шунингдек, уларга оилалари билан боғланиш имконияти ҳам яратилган.

Ҳеч ким ўз қарорини ўзгартирмаган, аммо бир киши оиласи билан суҳбатдан кейин самолётга кечроқ чиққан. Вазирнинг таъкидлашича, у бундай қарорни мустақил равишда қабул қилган ва унга ҳеч қандай босим ўтказилмаган.

Аэропортда Австралиядаги эронлик диаспора вакиллари ҳам тўпланиб, футболчиларни қўллаб-қувватлаган ва уларнинг Эронга қайтарилишига қарши норозилик билдирган. Улар айрим ўйинчилар ёрдам сўраб ишора берганини айтган. Ҳозирча мадҳияни куйлашдан бош тортгани учун футболчилар ва уларнинг оилаларига Эронда қандай жазо қўлланилиши номаълум.

Гуманитар виза олган аёллар Австралияда яшаш, ишлаш ва ўқиш ҳуқуқига эга бўлади. Кейинчалик улар доимий яшаш ҳуқуқини ҳам тезлаштирилган тартибда олишлари мумкин. Беш нафар футболчи ўз исмларини очиқлашга рози бўлган: Фотима Пасандидеҳ, Захро Ганбари, Захро Сарбали, Атефе Рамазонзода ва Мона Ҳамуди. Улар сиёсий фаол эмаслигини, фақат хавфсизликни истаётган спортчилар эканини билдирган.

Бу воқеа жамоанинг Жанубий Кореяга қарши биринчи ўйинида футболчилар миллий мадҳия пайтида жим туриб қолганидан кейин бошланган. Видео ижтимоий тармоқларда кенг тарқалган ва бу ҳаракат Эрон ҳукуматига қарши норозилик белгиси сифатида баҳоланган.

Эрон давлат ОАВлари эса бу ҳаракатни қаттиқ танқид қилган. Телевидение бошловчиларидан бири буни “ватанга хиёнат” деб атаган ва футболчиларга нисбатан қаттиқ чора кўриш кераклигини айтган.

Ҳуқуқ ҳимоячилари бундай баёнотлардан кейин футболчиларнинг хавфсизлиги учун жиддий хавотир билдирган. Чунки Эронда давлатга хиёнат айби учун оғир жазолар, ҳатто ўлим жазоси ҳам қўлланиши мумкин.

Австралиядаги қочқинлар ҳуқуқини ҳимоя қилувчи ташкилотлар ва фаоллар ҳукуматни футболчиларни ҳимоя қилишга чақирган. Шунингдек, Эроннинг собиқ шоҳининг ўғли Ризо Паҳлавий ҳам Австралия ҳукуматидан уларга хавфсизлик ва ёрдам беришни сўраган.