Банан олиб келган кемадан 1,5 тонна кокаин топилди

Россиянинг Санкт-Петербург шаҳрига Эквадордан етиб борган кемада оғирлиги 1,5 тоннадан ортиқ бўлган кокаин юки топилди. Бу ҳақда Россия Федерал божхона хизмати хабар берди.

Россия Федерал хавфсизлик хизмати ва Федерал божхона хизмати ходимлари кокаинни банан солинган юк орасидан топган. Уларнинг таъкидлашича, бу Россия божхона хизмати томонидан амалга оширилган энг йирик кокаин мусодараси бўлган.

Юк 29 август куни Санкт-Петербург денгиз портига етиб борган “Cool Emerald” кемасидан топилган бўлиб, унда кокаин солинган 1500 дона брикет бўлган. Кемада ўрами билан бирга оғирлиги 1750 кг (соф оғирлиги 1515 кг) бўлган 63 қути бўлган. Брикетлардан бирига “Фенди” деб белги қўйилган.

Юкнинг қора бозордаги қиймати 20 миллиард рублга (240 минг АҚШ доллари) баҳоланмоқда.

Ҳолат юзасидан Болтиқбўйи божхона хизмати томонидан Россия Жиноят кодексининг 229.1-моддаси (Гиёҳвандлик воситаларининг ўта йирик миқдордаги контрабандаси, умрбод озодликдан маҳрум қилиш билан жазоланади) билан жиноят иши қўзғатилган. 

“Ҳозирда наркотик моддалар контрабандаси билан шуғулланган уюшган жиноий гуруҳ аъзоларини аниқлаш ва қўлга олиш бўйича тезкор-қидирув ва тергов ҳаракатлари олиб борилмоқда”, дейилади Россия Федерал божхона хизмати хабарида.

Эслатиб ўтамиз, 2023 йилда Тошкент халқаро аэропортида 8,5 тонна гиёҳвандлик моддаси тўхтатиб қолинганди.