“Барселона” Левандовскидан бонусни тежаш учун гол урмасликни сўраган – манба

Каталониянинг “Барселона” жамоаси 2022-2023 йилги мавсум охирида ҳужумчи Роберт Левандовскидан Мюнхен “Бавария” клубига 2,5 миллион евро бонус тўламаслик учун гол урмасликни сўраган. Бу ҳақда Роберт Левандовскининг таржимаи ҳоли муаллифи Себастьян Сташевскийга таяниб, “Cadena СЕР” хабар берди.

Себастьян Сташевскийнинг ёзишича, агар Левандовски Ла Лигада 25 тадан ортиқ гол урганида, “Барселона” “Бавария”га бонус тўлаши керак бўлган. Ўша пайтда Хави қўл остидаги “Барселона” чемпионликни қўлга киритган, Левандовски эса 23 гол билан тўпурарлар пойгасида етакчилик қилаётган эди.

Машғулотларнинг биридан сўнг футболчидан бир нечта раҳбарлар, жумладан президент Жоан Лапортанинг офисига кириш сўралган. Китобга кўра, юқори мартабали амалдорлардан бири: “Роберт, биз сўнгги бир неча ўйиндаги гол урмаслигингни хоҳлаймиз”, деган.

Сташевский “El Larguero” радиосига берган интервьюсида хабарни ишончли деб айтди, у камида беш ишончли манба билан маслаҳатлашганини ва бу воқеа ҳақиқат эканини таъкидлади. Шунингдек, муаллиф клубнинг молиявий вазиятини тушунган ҳолда, илтимосни тушунтирганини билдирди.

 “Бу биринчи ва эҳтимол охирги марта ундан гол урмасликни сўрашди. Аввалига бу ажабланарли туюлиши мумкин эди, лекин у клубнинг молиявий аҳволини ҳисобга олган ҳолда, сўровни тушунди”, дейди Сташевски.

Ҳужумчи бу сўровни ҳайрат билан қабул қилган. Китобда ёзилишича, Левандовски илгари ҳеч қачон шундай сўровга дуч келмаган, чунки унинг фаолияти давомида ҳеч ким ундан ихтиёрий равишда гол уришни тўхтатишни сўрамаган. Натижада, Левандовски Испания чемпионатидаги сўнгги икки ўйинда гол ура олмаган.