Белграддаги парламент биноси олдида портлаш содир бўлди (видео)

Бугун, 22 октябрь куни Белграддаги Сербия парламенти биноси олдида номаълум шахс отишма уюштирди. Бу ҳақда “Blic” нашри хабар берди.

Нашрнинг ёзишича, ҳодиса мухолифат намойишчилари томонидан ташкил этилган чодирли лагерь қаршисида содир бўлган. Отишма оқибатида бир киши жароҳат олган ва ёнғин чиққан. Сербия Президенти Александр Вучич воқеани террорчилик ҳужуми деб атаган.

Ижтимоий тармоқларда тарқалган видеоларда чодирдан бир эркак чиқиб келаётгани, у жароҳати сабаб бир оёғида сакраб юргани кўринади. Тез орада полиция ҳодиса жойига етиб борган. Бир неча сониялардан сўнг чодирлар ёниб кетган.

“Telegraf” нашрига кўра, ўт очган эркак газбаллонига ўқ узган ва оқибатда портлаш ҳам юз берган. Полиция ҳужумчини қўлга олишга муваффақ бўлган.

“Отишма содир бўлган пайтда парламент биносида шаҳар атрофидаги уйларни тақсимлаш бўйича шартномаларни имзолаш маросими ўтаётган, унда Сербия Президенти ҳам иштирок этаётган эди”, дейилади хабарда.

Вучич мажлисни тарк этишга мажбур бўлиб, воқеа юзасидан баёнот берган.

“Мен бу ажойиб йиғилишни тарк этишга мажбур бўлаётганим учун биринчи бўлиб узр сўрашим керак. Чунки Сербия Республикасининг Халқ мажлиси қаршисида террорчилик ҳужуми содир бўлди”, дейди Президент.

Эслатиб ўтамиз, аввалроқ Қуддус шаҳри шимолидаги Рамот чорраҳасида икки қуролли шахс автобус бекатига ўт очган эди. Хавфсизлик ходими ва бир фуқаро қарши ўт очиб, ҳужумчиларни “зарарсизлантирган”. Оқибатида беш киши ҳалок бўлган, шунингдек, терактни уюштирган икки киши ўлдирилганди.