Германия Шольц билан видолашди (видео)

Кеча, 5 май куни Берлиндаги Бендлерблок ҳарбий мажмуаси ҳовлисида Германия канцлери Олаф Шольц билан видолашув маросими бўлиб ўтди. Бу ҳақда “Deutsche Welle” хабар берди.

Анъанавий “Буюк оқшом шон-шуҳрати” (Der Große Zapfenstreich) маросимида сўзлаган Шольц ҳамжиҳатликка, демократик қадриятларни асраб-авайлашга чақирди. Унинг сўзларига кўра, бугун, 6 май куни бўлиб ўтадиган ҳукумат алмашинуви “демократик меъёрнинг кўриниши” бўлади.

“Шунинг учун ҳам демократлар ўртасидаги цивилизациялашган мулоқотни ҳимоя қилиш жуда муҳим, чунки бу қимматли. Демократик давлатда лавозимлар ҳар доим маълум муддатга берилади. Бизни бутун дунёдаги автократиялардан ажратиб турадиган нарса шу”, деб таъкидлади лавозимини тарк этаётган канцлер.

Шольц канцлер лавозимини эгаллашга тайёрланаётган Фридрих Мерцга “кўп муваффақиятлар, омад ва енгиллик” тилади. 

“Германиянинг федерал канцлери сифатида хизмат қилиш менинг ҳаётимнинг шарафи бўлган ва шундай бўлиб қолади”, дея сўзини якунлади Шольц.

Бендлерблокдаги маросимда 300 га яқин аскар ва офицер иштирок этди. Меҳмонлар орасида Федерал Президент Франк-Вальтер Штайнмайер ва бўлажак канцлер Фридрих Мерц ҳам бор эди. Тадбир давомида Бундесвер оркестри анъанавий тарзда истеъфога чиққан канцлер танлаган учта композицияни ижро этди.

Олаф Шольц хайрлашув учун турли даврларнинг классикаларини танлади – “The Beatles” гуруҳининг “In My Life”, Бахнинг концертларидан биридан парча ва Арета Франклиннинг “Respect” қўшиғи.

“Буюк оқшом шон-шуҳрати” (Der Große Zapfenstreich) ҳарбий видолашув Германия Қуролли Кучлари фуқарога кўрсатиши мумкин бўлган энг юқори ҳурмат ҳисобланади. Федерал канцлерлардан ташқари, бу одат федерал президентлар ва мудофаа вазирлари лавозимини тарк этганда уларга ҳурмат кўрсатиш учун ҳам қўлланилади.

Анъана XVI асрга бориб тақалади. Маросим ҳар доим кечқурун бўлиб ўтади ва бир нечта мусиқий композициялардан, жумладан, миллий мадҳия ва маршдан иборат. Бундан ташқари, анъанавий равишда машъалалар ёқилади.

Маълумот учун, 2021 йил сентябрь ойида Германия социал демократик партиясининг парламент сайловларида ғалаба қозонганидан сўнг Олаф Шольц федерал канцлер лавозимига кўрсатилган ва янги коалиция тузилганидан сўнг ўша йилнинг декабрь ойида ўз лавозимини эгаллаган.

Канцлер сифатида у ўсиб бораётган иқтисодий муаммолар (биринчи навбатда турғунлик), миграция сиёсати ва Россия агрессиясига қарши Украинага ҳарбий ёрдамнинг сустлиги учун танқид қилинди.

2024 йил декабрь ойида коалиция парчаланди ва 2025 йил февраль ойида парламент сайловлари бўлиб ўтди, унда Германия социал демократик партияси Христиан-демократик ва Христиан-социал иттифоқи (ХДС/ХСС)га мағлуб бўлди.