Бошпана сўрашдан бош тортган эронлик футболчилар Уммонга учиб кетишди

Австралиядан бошпана сўраб мурожаат қилган, бироқ кейинчалик бу қароридан қайтган Эрон аёллар футбол терма жамоасининг беш нафар аъзоси кеча, 16 март куни Куала-Лумпурдан Уммонга учиб кетди. Бу ҳақда ABC телеканали Осиё футбол конфедерацияси (ОФК) вакилларига таяниб хабар берди.

Маълум қилинишича, футболчилар жўнаб кетишдан аввал Куала-Лумпурда Эрон элчихонаси вакиллари билан учрашиб, кейинги сафарларини мувофиқлаштириш учун зарур процедураларни бажарган. ОФК бош котиби Виндсор Жон уларнинг кайфияти яхши бўлганини таъкидлади. Шунингдек, конфедерация футболчиларнинг Уммонга етиб боргач, қандай режалари борлиги ҳақида маълумотга эга эмаслигини билдирган, чунки парвоз Эрон элчихонаси томонидан ташкил этилган.

Манбага кўра, улар якунда Теҳронга қайтиши кутилмоқда.

Аввалроқ Эрон аёллар терма жамоасининг етти нафар аъзоси Австралиядан бошпана сўраб мурожаат қилган эди. Кейинчалик уларнинг беш нафари бу қароридан воз кечиб, Эрон дипломатик ваколатхонасига мурожаат қилган. Австралия ички ишлар вазири Тони Берк мамлакат расмийлари футболчиларга Австралияда қолиш имкониятларини бир неча бор тушунтирганини маълум қилган, бироқ айрим ОАВ хабарларига кўра, ушбу футболчиларга мамлакатида оила аъзоларига босим ўтказилган ҳолда Эронга қайтишга мажбур қилинган.

Хабарларга кўра, ҳозирда икки нафар футболчи Австралияда қолмоқда, аммо уларнинг жойлашуви ошкор этилмаган.

Эслатиб ўтамиз, аввалроқ Эрон давлат телевидениеси янгиликлар бошловчиси Муҳаммад Ризо Шаҳбозий мамлакат аёллар футбол терма жамоасини Осиё кубоги ўйинидан олдин давлат мадҳиясини куйламагани учун “хиёнат”да айблаганди. Шундан сўнг ҳатто, футболчиларга мамлакатга қайтган тақдирда ўлим таҳдидлари бўлган.