Чарльз III Трампга сувости кемасининг қўнғироғини совға қилди

Буюк Британия қироли Чарльз III Вашингтонга ташрифи чоғида АҚШ Президенти Дональд Трампга совға топширди – монарх Оқ уй раҳбарига кема қўнғироғини тақдим этди. Бу ҳақда “C-Span” хабар берди.

Қайд этилишича, бу 1944 йилда хизматни бошлаган Британиянинг HMS Trump сувости кемасига тегишли қўнғироқ. Совға Буюк Британия ва АҚШнинг НАТО ва AUKUS ҳарбий альянсларидаги ҳамкорлиги қадриятлари ҳақидаги суҳбатдан сўнг топширилган.

“Сизга шахсий совға сифатида сизнинг жасур номдошингиз рубкасида (бошқарув хонасида) осилиб турган асл қўнғироқни тақдим этишдан мамнунман. У мамлакатларимизнинг умумий тарихи ва порлоқ келажагининг гувоҳи бўлсин”, дейди Чарльз III.

Қирол, шунингдек, агар Трампга қачондир Буюк Британия билан боғланиш керак бўлса, “шунчаки қўнғироқ қилиш” (инглиз тилида ring сўзи ҳам қўнғироқ чалиш, ҳам телефон қилиш маъносини англатади) кифоя эканлигини айтиб, ҳазиллашган.

Эслатиб ўтамиз, аввалроқ Буюк Британия қироли Чарльз III ва унинг рафиқаси қиролича Камилла расмий ташриф билан АҚШга боргани ҳақида хабар берилган эди.