Дуров Россиядаги Telegram узилишларини танқид қилди

Россияда фойфаланувчилар бир неча кундан бери Telegram мессенжери фаолиятида муаммолар юзага келаётгани ҳақида хабар бермоқда. Бу ҳолат кеча, 10 февраль куни Роскомнадзорнинг мессенжер фаолиятини чеклаш ҳақидаги қароридан кейин юз бергани айтилмоқда.

Telegram асосчиси Павел Дуров мазкур вазиятга муносабат билдириб, платформа сўз эркинлиги ва фойдаланувчиларнинг шахсий ҳаётига ҳурмат тамойилларига содиқ қолишини маълум қилди.

“Фуқароларнинг эркинликларини чеклаш ҳеч қачон тўғри қарор эмас. Telegram ҳар қандай босимдан қатъи назар, сўз эркинлиги ва шахсий ҳаёт дахлсизлигини ҳимоя қилади”, дейди Дуров.

У, шунингдек, 2018 йилда Эрон суди мамлакатда Telegram’дан фойдаланишни тақиқлаганини эслатди. Дуровнинг сўзларига кўра, ўша пайтда ҳам чекловлар кутилган натижани бермаган.

“Саккиз йил олдин Эрон ҳам худди шундай стратегияни синаб кўрган ва муваффақиятсизликка учраган эди. Тақиққа қарамай, аксарият эронликлар cензурани четлаб ўтиб, Telegram’дан фойдаланишда давом этмоқдалар”, дейди у.

Ҳозирча Россия расмийлари чекловнинг сабаблари ва муддати бўйича расмий изоҳ бермаган.

Эслатиб ўтамиз, аввалроқ Россияда Telegram фаолияти қисман чеклана бошлагани ҳақида хабар берилганди. Мессенжер мамлакатда аввал ҳам таъқиқларга учраган, Хусусан, 2018 йилда тўлиқ блокланган бўлса, 2025 йилда қўнғироқларга чеклов ўрнатилган.

Жамшидбек Амиров