Эрон АҚШни сулҳни мунтазам бузаётганликда айблади

Эрон Ташқи ишлар вазирлиги АҚШнинг ўт очишни тўхтатиш режимини бир неча бор бузгани ва Эрон ҳамда минтақадаги айрим давлатларга қарши таҳдидли баёнотларини кескин қоралади. Бу ҳақда вазирлик баёнотида айтилади.

Эрон ТИВ расмий вакили Исмоил Бағоий бугун, 28 май куни тонгда Бандар Аббос ҳудудига АҚШ томонидан уюштирилган ҳарбий ҳужумни қаттиқ қоралаб, бу ҳаракатлар Эроннинг ҳудудий яхлитлиги ва миллий суверенитетига қарши тажовуз эканини таъкидлаган. Унинг сўзларига кўра, бу халқаро ҳуқуқ ва БМТ Низомининг қўпол равишда бузилиши ҳисобланади ва БМТ Хавфсизлик Кенгаши АҚШни жавобгарликка тортиш бўйича ўз мажбуриятини бажариши керак.

Бағоий АҚШ томонидан жорий йил 8 апрелда эълон қилинган ўт очишни тўхтатиш режимининг мунтазам бузилаётганини, хусусан, Форс кўрфази ва очиқ денгизлардаги тижорат кемаларига қарши ҳаракатлар ҳамда сўнгги кунларда Эрон жанубига қилинган ҳаво ҳужумларини эслаб ўтган. Шу билан бирга, у Эрон Ислом Республикаси БМТ Низомининг 51-моддасига мувофиқ миллий суверенитет ва ҳудудий яхлитликни ҳимоя қилиш учун барча зарур чораларни кўришга тайёрлигини билдирган.

Шунингдек, ТИВ вакили АҚШ амалдорларининг Эрон ва минтақадаги бошқа давлатларга қарши таҳдидли баёнотларини ҳам қоралаб, дўст ва биродар давлат Уммон билан ҳамжиҳатликни таъкидлаган.

Эслатиб ўтамиз, аввалроқ АҚШ Президенти Дональд Трамп Эрон билан олиб борилаётган музокаралардан норозилиги ва Америка ҳарбийлари мамлакатда ҳарбий ҳаракатларни қайта бошлаши мумкинлиги ҳақида хабар берилганди.