Эрон Apple, Google ва Microsoft офисларига зарба бермоқчи

Ислом инқилоби қўриқчилари корпуси (ИИҚК) Apple, Google, Microsoft ва бошқа Америка технологик компанияларининг Яқин Шарқдаги офисларига зарба бериш билан таҳдид қилди. Улар ушбу компанияларни Исроил ва АҚШ ҳужумларига кўмаклашишда айбламоқда. Бу ҳақда ИИҚК баёнотига таяниб, “Tasnim” хабар берди.

Нашрнинг ёзишича, 1 апрелдан бошлаб Эрон ҳарбийлари 18 та корпорация объектларига ҳужум қилишни бошлайди. Илк зарбалар Теҳрон вақти билан соат 20:00 га белгиланган. Компания ходимларига “иш жойларини зудлик билан тарк этиш”, яқин атрофда яшовчи аҳолига эса хавфсиз жой топиш тавсия қилинган.

Эҳтимолий нишонлар рўйхатига қуйидагилар киритилган:

• Техника ишлаб чиқарувчилар: Apple, HP, Intel, Dell;
• IT-гигантлар: Microsoft, Google, Meta, Oracle;
• Сунъий интеллект ва авиасозлик: Nvidia, Palantir, Boeing;
• Молия ва энергетика тузилмалари: J.P. Morgan, Tesla, GE.

ИИҚК баёнотида таъкидланишича, “террорчилик ҳужумлари учун нишонларни ишлаб чиқиш ва кузатишда АҚШнинг АКТ (ахборот-коммуникация технологиялари) ва СИ (сунъий интеллект) соҳасидаги компаниялари асосий элемент бўлгани сабабли”, улар “қонуний нишон” деб ҳисобланади. 

“Шундай экан, ким сенга ҳужум қилса, сен ҳам унга худди шундай ҳужум қил”, дейилади Эрон ҳарбийлари баёнотида.

Ушбу қарор Эрон фуқароларининг ўлимига сабаб бўлган АҚШ ва Исроилнинг яқиндаги ҳужумларига жавоб экани айтилмоқда. Эроннинг ISNA агентлиги маълумотларига кўра, 31 март куни Занжон шаҳридаги диний мажмуага берилган зарба оқибатида тўрт киши ҳалок бўлган. Шу куни ИИҚК Эрон Қуролли кучлари Бош штаби бошлиғининг маслаҳатчиси Жамшид Эсҳақий ҳалок бўлганини маълум қилган.

Шу билан бирга, “The Wall Street Journal” нашрининг хабар беришича, АҚШ Президенти Дональд Трамп ўз ёрдамчиларига Ҳормуз бўғози кемалар қатнови учун ёпиқ қолиши ва Теҳрон назорати остида бўлишига қарамай, Эронга қарши урушни тўхтатишга тайёрлигини маълум қилган. Оқ уйдаги манбаларнинг таъкидлашича, Трамп ва унинг жамоаси бўғозни очиш бўйича операция низони янада чўзиб юборади, деган хулосага келган. Шу муносабат билан АҚШ асосий мақсадларга – Эрон ҳарбий-денгиз флотини заифлаштириш ва унинг ракета захираларини қисқартиришга эришиб, сўнгра ҳарбий ҳаракатларни тўхтатиш ва Теҳронга дипломатик босим ўтказишни давом эттиришни кўзламоқда. Агар бу иш бермаса, Вашингтон Европа ва Форс кўрфазидаги иттифоқчиларидан Ҳормуз бўғозини очиш бўйича ташаббусни ўз зиммаларига олишни талаб қилмоқчи.

“Associated Press” маълумотларига кўра, Саудия Арабистони, БАА, Қувайт ва Баҳрайн вакиллари шахсий мулоқотларда Трампни Эрон раҳбариятида жиддий ўзгаришлар юз бермагунча ёки Теҳроннинг хатти-ҳаракатлари кескин ўзгармагунча зарбаларни давом эттиришга ундамоқда. Оқ уй эса Эрон билан 6 апрелгача келишувга эришишдан умидвор эканини билдирган.

Февраль ойи охирида АҚШ ва Исроилнинг ҳарбий операцияси бошланганидан сўнг Эрон жаҳон бозорига нефтнинг қарийб 20 фоизи ва суюлтирилган табиий газнинг (СТГ) 30 фоизи етказиб бериладиган Ҳормуз бўғозида кемалар қатновини амалда тўсиб қўйди. Бу жаҳон бозорида энергия ресурслари нархининг кескин кўтарилишига сабаб бўлди. Ўтган ҳафта Трамп, агар Теҳрон бўғозни очмаса, Эрон электр станцияларига зарба бериш билан таҳдид қилган эди, бироқ кейинроқ музокаралар учун зарбаларни аввал беш кунга, сўнгра ўн кунга кечиктирди.

АҚШ воситичилар орқали Эронга урушни якунлаш бўйича 15 банддан иборат режани тақдим этди, унда ядро дастуридан воз кечиш ва ракета дастурини чеклаш назарда тутилган. Бунга жавобан Эрон ҳукумати Ҳормуз бўғози устидан суверен ҳуқуқини тан олишни талаб қилди ва ушбу сув йўли орқали кемалар ўтишини пуллик қилишга қарор қилди.

Эслатиб ўтамиз, аввалроқ АҚШ Президенти Дональд Трамп Эрон билан боғлиқ ҳарбий операция яқин ҳафталарда якунланишини маълум қилганди.