Эрон Исроил учун жосуслик қилган эркакни қатл этди

Кеча, 28 январь куни Эрон Исроилнинг Моссад разведка хизмати фойдасига жосуслик қилганликда айбланган эркакни қатл этди. Бу ҳақда “Iran International” хабар берди.

Ушбу шахс 2025 йилнинг апрель ойида ҳибсга олинган бўлиб, Исроил фойдасига жосуслик қилганликда айбланган. Шунингдек, у Исроилга Эроннинг ракета объектларида диверсиялар уюштиришга ёрдам бериши мумкин бўлган ускуналарни харид қилганликда гумон қилинган. Тергов маълумотларига кўра, у портловчи моддалар ўрнатилган автомобилларда ҳаракатланган.

7 январь куни ҳам Эронда Моссадга маълумот узатганликда айбланган яна бир эркак қатл этилган эди. Агентликнинг қайд этишича, Эрон узоқ йиллардан бери Исроилни ядро объектларига қарши диверсиялар уюштиришда ҳамда эронлик олимларни ўлдиришда айблаб келади.

2025 йилнинг декабрь ойида Эронда иқтисодий вазиятдан норозилик сабабли кенг кўламли намойишлар бошланган, тартибсизликлар давомида тахминан икки минг киши ҳалок бўлган. Эрон расмийлари ушбу норозиликларни АҚШ ва Исроил билан боғлаган.

Намойишлар қатъий бостирилган фонида АҚШ Президенти Дональд Трамп Эронга йирик ҳарбий зарба бериш ва давлат яқинига қўшин жойлаштириш билан таҳдид қилган. 16 январь куни Трамп бундай режадан воз кечганини ва бунга 800 нафар маҳкумнинг қатл этилиши бекор қилингани сабаб бўлганини айтган эди.

28 январдаги қатл ана шу қарордан кейинги биринчи ҳолат бўлган.

2025 йил июнь ойида Эрон расмийлари жосусликда айбланган уч кишини қатл этган, улар диверсия учун мўлжалланган ускуналарни спиртли ичимликлар кўринишида олиб киришга уринганликда айбланган эди. 22 июнь куни эса Исроил фойдасига махфий маълумотлар, жумладан айрим шахслар ҳақидаги маълумотларни узатганликда гумон қилинган яна бир эркак қатл этилган.

Эслатиб ўтамиз, аввалроқ БМТнинг Инсон ҳуқуқлари бўйича идораси 2025 йилда дунё бўйлаб қатл этишлар сони кескин ошганини қайд этганди. Статистикага кўра, Эрон 2025 йилда камида 1500 кишини қатл этган бўлиб, уларнинг 47 фоизи гиёҳванд моддалар билан боғлиқ жиноятлар учун жазоланган.