Эрон пойтахти барибир кўчириладиган бўлди (видео)

Кеча, 20 ноябрь куни Эрон Президенти Масъуд Пезешкиён пойтахтни Теҳрондан кўчириш зарурати туғилганини маълум қилди. Бу ҳақда “Farsnews” хабар берди.

Эрон пойтахтининг Теҳрондан кўчирилиши масаласи атиги бир неча ҳафта ичида кескин ўзгаришларга учради. Аввалига расмийлар бу масала кун тартибидан олинганини эълон қилган бўлса, орадан кўп ўтмай Президент Масъуд Пезешкиён пойтахтни кўчириш “мажбурий чорага айланганини” маълум қилди.

Олдинроқ, ҳукумат вакили Али Абдулализоде Теҳронга Форс кўрфазидан сув етказувчи минг километрлик мегалойиҳа ишга туширилгани учун пойтахтни кўчириш масаласи бекор қилинганини айтган эди.

Аммо Президентнинг кейинги чиқишлари вазиятнинг жиддийлигини очиқ кўрсатди. 

“Бугун реал вазият шуки, бизда бошқа йўл қолмади. Пойтахтни кўчириш мажбурий чорадир. Агар ер кунига 30 сантиметр чўкаётганини айтсак, бу фалокатдир”, деди у.

Президент бу ҳолатни “миллий ҳалокат” деб атаб, экологик муаммоларни жамоатчилик, амалдорлар ва илмий доиралар ҳар куни муҳокама қилиши зарурлигини айтди.

Эрон метеорология ташкилотлари ҳузуридаги Миллий об-ҳаво башорати марказининг маълум қилишича, бутун мамлакат бўйлаб ёғингарчилик миқдори узоқ йиллик ўртача кўрсаткичга нисбатан қарийб 89 фоизга камайган. Жорий куз Эрон учун сўнгги 50 йилдаги энг қуруқ мавсум бўлди.

Ноябрь бошида икки ҳафта ичида Теҳронда ичимлик суви тугаши мумкинлиги ҳақида хабар берилганди. Пезешкиён пойтахтнинг 15 миллион аҳолиси эвакуация қилиниши эҳтимолини ҳам тан олганди.

Шунингдек, Эрон расмийлари мамлакатда ёғингарчиликни сунъий чақириш мақсадида булутларни кўпайтириш технологиясини қўллашни бошлаганини билдирди.

Айни пайтда Эрон ҳукуматининг кейинги қарори ва кўчириш жараёнининг қайси ҳудудга йўналтирилиши ҳақида расмий маълумотлар кутилмоқда.

Комила Қобилова