Эронга қарши санкцияларни кучайтиришни кўриб чиқяпмиз – Урсула фон дер Ляйен

Европа Иттифоқи расмийлари Теҳронга қарши санкциялар янада кучайтирилиши мумкинлигини истисно қилмаяпти. Бу ҳақда кеча, 15 январь куни Кипрда бошланган Европа Иттифоқи комиссарлари ҳайъатининг икки кунлик йиғилишида иштирок этаётган Еврокомиссия раҳбари Урсула фон дер Ляйен Кипр Президенти Никос Христодулидис билан қўшма матбуот анжуманида маълум қилди. 

АҚШ ва Исроилнинг Эрон ишларига ҳарбий аралашувини кутаётгани ҳақидаги саволга жавоб берар экан, фон дер Ляйен шундай деди: 

“Мен бошқа давлатларнинг ҳаракатларига изоҳ бера олмайман – бу уларнинг иши. Аммо биз ҳақиқатдан ҳам Эронга қарши санкцияларни кучайтириш имкониятини кўриб чиқмоқдамиз”.

ЕК раҳбарининг таъкидлашича, Эрондаги ҳукуматга қарши намойишлар иштирокчилари Европа Иттифоқи расмийларига ўз мамлакатларидан келган янги шахсларни санкциялар рўйхатига киритиш илтимоси билан мурожаат қилган. Шунингдек, у Эронда нима бўлаётганини жуда яхши тушунишини айтган ва норозилик намойишлари иштирокчиларининг илтимосини бажаришга ваъда берган.

Эронда норозилик намойишлари 2025 йил охиридан бери давом этмоқда. 29 декабрь куни риал курсининг кескин тушиши сабабли дўкон эгалари кўчага чиқди, эртаси куни уларга талабалар ҳам қўшилди. Кейинчалик тартибсизликлар Эроннинг барча вилоятларини қамраб олди. 2026 йил 2 январь куни кўчаларда қуролли гуруҳлар пайдо бўлди, ҳуқуқ-тартибот идоралари ходимлари билан тўқнашувлар кучайди, норозилик намойишларининг энг юқори чўққиси 8 январга тўғри келди. Эрон расмийлари босқинчиларни террорчилар деб атаб, Исроил ва АҚШни тартибсизликларни уюштирганликда айблади.