Это’о Африка кубогидаги ҳаракатлари учун жазоланди

Камерун футбол федерацияси президенти Самюэль Это’о Африка кубоги чорак финалининг Марокашга қарши ўйинда спорт меъёрларини бузгани учун тўртта ўйинга дисквалификация қилинди. Бу ҳақда “daily-sun” хабар берди.  

Учрашув жорий йилнинг 9 январь куни бўлиб ўтган ва унда Марокаш терма жамоаси 2:0 ҳисобида Камерун устидан ғалаба қозонган. Дисквалификациядан ташқари, Это’о 20 000 доллар жаримага тортилган. Африка футбол конфедерацияси (CAF) воқеаларнинг аниқ тафсилотларини очиқламаган, бироқ ОАВ хабарларига кўра, ўйинда Это’о Марокаш қироллик футбол федерацияси президенти Фузи Лекжаага ишора қилиб, уни ҳақорат қилган.

Камерун футбол федерацияси CAF қарорини эътиборга олганини, бироқ унда аниқ асос келтирилмаганини таъкидлаган. Шунингдек, ташкилот қарорни тезлаштирилган тартибда қабул қилинганлиги, адолатли суд жараёни тамойилларининг бузилиши юзасидан жиддий шубҳалар уйғотганини қайд этган. Федерация эса Это’о нинг қонуний ҳимоя чораларидан фойдаланиш ниятини қўллаб-қувватлашини маълум қилган.

Маълумот учун, 44 ёшли Это’о 2021 йилдан бери Камерун футбол федерацияси президенти сифатида фаолият юритмоқда. Футболчилик фаолияти давомида у “Реал Мадрид”, “Барселона”, “Интер”, “Сампдория”, “Челси”, “Эвертон”, “Антальяспор”, “Коньяспор” ва “Қатар СК” каби клубларда тўп сурган. 
Камерун терма жамоаси сафида эса Это’о 118 та ўйинда майдонга тушган ва 56 та голга муаллифлик қилган.