Францияда қарийб 1000 та авиарейс бекор қилинди

Кеча, 4 июль куни Францияда диспетчерлар томонидан эълон қилинган икки кунлик иш ташлаш ортидан мамлакатдаги умумий авиарейсларнинг тахминан 10 фоизига тўғри келадиган 933 та парвоз бекор қилинди. Бу ҳақда “Le Figaro” хабар берди.

Қайд этилишича, пойтахт Париждаги икки аэропортда бу кўрсаткич 25 фоизга етган. Иш ташлашнинг иккинчи куни эса янада оғирроқ кечиши мумкин. Хусусан, Франция Фуқаро авиацияси бошқармаси (DGAC) авиарейсларнинг 40 фоизини бекор қилишни тавсия этмоқда.

Франция Транспорт вазири Филипп Табаро ёзги таътил мавсумида авиация диспетчерларининг иш ташлашини танқид қилган.

“Мамлакатимизда 272 киши ярим миллиондан ортиқ одамнинг фаровонлиги ҳақида қарор қабул қилмоқда. Бу – қабул қилиб бўлмайдиган ҳолат”, дейди у CNews нашрига берган интервьюсида.

Бош вазир Франсуа Байру диспетчерларни “французларни гаровда ушлаб туриш”да айблаган. Европа авиакомпаниялари ассоциацияси Airlines for Europe эса иш ташлашни “қабул қилиб бўлмайдиган” деб атаган.

Икки кунлик иш ташлаш иккита диспетчерлар касаба уюшмаси томонидан эълон қилинган бўлиб, улар меҳнат шароитларини яхшилашни талаб қилмоқда. Жумладан, улар штатларнинг етарлича тўлдирилмаганини ва “зарарли бошқарув”ни танқид қиляпти. Иш ташлаш иштирокчилари, шунингдек, диспетчерларнинг иш вақтига нисбатан назоратни кучайтиришни кўзда тутувчи ислоҳотга қарши чиқмоқда. Бу қарор 2022 йил охирида Бордода икки самолёт тўқнашувининг олди зўрға олинганидан сўнг қабул қилинган. Ўшанда олиб борилган тергов натижасида авиация диспетчерлари ишининг ёмон ташкил этилгани аниқланган.

Эслатиб ўтамиз, аввалроқ Германиянинг 13 та аэропортида ходимларнинг бир кунлик огоҳлантирувчи иш ташлаши бўлган эди. Оқибатда 3 минг 400 дан ортиқ рейс бекор қилинган ва тахминан 510 минг йўловчи зарар кўрган.