Францияда Россия фойдасига жосуслик қилганлар ушланди

Францияда икки эркак ва бир аёл Россия фойдасига жосуслик қилиш ҳамда жамоатчилик фикрига таъсир ўтказишга уринишда гумонланиб ҳибсга олинди. Бу ҳақда “Deutsche Welle” хабар берди.

Маълум қилинишича, Франция ҳукумати Россия манфаатлари йўлида жосуслик ва беқарорлик келтирувчи ҳаракатларда гумон қилинаётган SOS Donbass гуруҳини тергов қилмоқда. Ушбу нодавлат ташкилот дастлаб Украинадаги урушдан зарар кўрган тинч аҳолига ёрдам берувчи кўнгиллилар жамоаси сифатида танилган.

Ҳибсга олинганлардан бири – 40 ёшли Россия фуқароси – сентябрь ойида Париждаги “Ғалаба арки” (Arc de Triomphe) ёдгорлигига россияпараст плакатлар жойлаштирганликда айбланмоқда.

Тергов маълумотларига кўра, плакатларни осиб қўйгандан сўнг у яна икки шахсни, жумладан 40 ёшли, Россия ва Франция паспортларига эга бўлган SOS Donbass раҳбари Анна исмли аёлни жалб қилган. Анна француз иқтисодий доираларидаги шахслар ҳақида маълумот тўплашга уринганликда гумон қилинмоқда.

Франция давлат хавфсизлик хизмати (DGSI) йил бошидан бери Аннани кузатиб келган ва уни “мамлакатнинг асосий манфаатларига зарар етказиши мумкин бўлган ҳаракатлар”да айбламоқда. Март ойида унга нисбатан “хорижий давлат фойдасига жосуслик қилиш” бўйича тергов бошланган. Аннани 10 йилгача қамоқ жазоси кутмоқда.

Учинчи гумонланувчи – 63 ёшли Винсент Париж яқинида истиқомат қилиши айтилган. Бироқ гумонланувчиларнинг Россияга аниқ қандай маълумот етказгани ошкор этилмаган. Фақатгина уларга Россия томонига мухолифатни йиғиш ва руспараст кайфиятни мамлакат ичкарисида тарқатишга уринганлик айби қўйилгани билдирилган.

Маълумот ўрнида, SOS Donbass ўзини Украинанинг урушдан вайрон бўлган шарқий ҳудудларига гуманитар ёрдам кўрсатувчи ташкилот сифатида танитади. Бироқ Франция разведка хизмати DGSI бу гуруҳ аслида жосуслик билан шуғуллангани ва Францияни беқарорлаштиришга қаратилган фаолият олиб борган бўлиши мумкинлигини таъкидламоқда.

Эслатиб ўтамиз, аввалроқ Россия ўсмирлардан жосус сифатида фойдалангани ҳақида хабар берилганди. Украина Хавфсизлик хизмати 2024 йилнинг баҳоридан бери 700 кишини Россия жосуси сифати ҳибсга олган. Улардан 175 нафари украиналик ўсмирлар бўлиб, уларга асосан ҳарбий иншоотлар ёки ҳаво ҳужумидан мудофаа тизимларини суратга олиш, портловчи моддаларни биноларга жойлаштириш, энергетика инфратузилмаси объектларига ёки ишга қабул қилиш марказларига ўт қўйиш каби вазифалар юклатилган.

Комила Қобилова