Германиялик Олимпиада чемпиони допинг сабаб спортдан четлатилди

Германиялик чанғичи ва Олимпиада чемпиони Виктория Карл 2026 йил февралда бўлиб ўтадиган Қишки Олимпиада ўйинларида қатнаша олмайди. Бу қарор унинг ёзда олинган допинг тестида ижобий натижа кўрсатганидан сўнг қабул қилинди. Бу ҳақда Германия чанғи спортлари ассоциацияси (DSV) хабар берди.

DSV’нинг хабарига кўра, Карл допинг бузилишида гумон қилинганлиги сабабли машғулотлар ва мусобақалардан вақтинча четлатилган эди. Германия миллий антидопинг агентлиги (NADA) жорий йилнинг 22 сентябрь куни икки йиллик тақиқни таклиф қилган ва шундан бери спортчи ва федерация “интизомий суд ишини тинч йўл билан ҳал қилиш” бўйича музокара олиб бораётган бўлган.

DSV Финляндиянинг Рука шаҳрида бошланадиган янги Жаҳон кубоги мавсуми олдидан Виктория Карл вақтинчалик спортдан четлатилганини маълум қилди. NADA’нинг расмий қарори ҳозирча эълон қилинмаган.

“Бу жуда оғир вақт эди, мен доим ҳаммаси яхши бўлишига умид қилардим. Бир лаҳзалик эътиборсизлик ва нотўғри тиббий муолажалар Олимпия орзумнинг барбод бўлишига олиб келди. Шу билан бирга, фаолиятимни давом эттиришга имкон берадиган тўғри ва ўз вақтида қарор қабул қилинишига умид қиламан”, дея изоҳ берди спортчи.

Карлнинг ижобий тест натижаси кленбутерол моддаси билан боғлиқ. 30 ёшли спортчи июль охирида олинган намунада ушбу препарат учун ижобий натижа қайд этилди. Карл ва DSV маълумотларига кўра, препарат немис қуролли кучлари шифокори томонидан спортчига юборилган йўтал сиропида бўлган.

Маълумот учун, Виктория Карл 2022 йилги Пекин қишки Олимпиада ўйинларида  жамоавий спринтда олтин ва эстафета пойгаларида кумуш медални қўлга киритган.

Эслатиб ўтамиз, аввалроқ ўзбекистонлик Олимпиада чемпиони Лазизбек Мулложоновда тақиқланган модда аниқлангани сабабли 3 йил муддатга мусобақалардан четлаштирилганини расман маълум қилинган эди.