Илҳом Алиев Мирзиёевни “узоқни кўра оладиган сиёсатчи” деб атади (видео)

Озарбайжон Президенти Илҳом Алиев Ўзбекистон Президенти Шавкат Мирзиёевнинг амалга ошираётган ишларига тўхталиб, уни узоқни кўра олиш қобилиятига эга сиёсатчи сифатида эътироф этди. Бу ҳақда у бугун, 16 ноябрь куни Марказий Осиё давлатлари раҳбарларининг еттинчи Маслаҳат учрашувидаги нутқида айтди.

“Аввало, Марказий Осиё давлат раҳбарларининг еттинчи маслаҳат учрашувида иштирок этиш таклифи учун Ўзбекистон Президенти Шавкат Миромонович Мирзиёевга чуқур миннатдорлик билдираман. Ўзбекистон томонига анъанавий меҳмондўстлиги учун ташаккур билдираман. Биродарим Шавкат Миромоновичнинг доно раҳбарлиги остида Ўзбекистон ривожланиш ва бунёдкорлик йўлидан ишончли тарзда бормоқда”, деди у.

Алиевнинг сўзларига кўра, Мирзиёевнинг юқори халқаро мавқеи, самарали иқтисодий ислоҳотлари, саноат, транспорт ва қишлоқ хўжалигидаги кенг кўламли лойиҳалари Ўзбекистонни минтақада етакчи мавқега кўтарган.

“Президентнинг кундалик ғамхўрлиги туфайли Ўзбекистон дунёнинг етакчи спорт давлатлари қаторидан жой олган. Яқинда бўлиб ўтган ёзги Олимпиада ўйинлари буни яққол кўрсатди. Шавкат Миромонович нафақат доно давлат арбоби, балки Ўзбекистон-Озарбайжон муносабатларини ривожлантиришга катта ҳисса қўшган инсондир”, таъкидлайди у.

Унинг айтишича, Озарбайжонда Мирзиёев ўзининг аниқ ҳаракатлари ва Озарбайжон халқига бўлган меҳрли муносабати учун севилади ва ҳурмат қилинади.

“Узоқни кўра оладиган сиёсатчи Шавкат Миромонович Марказий Осиё мамлакатлари ва Озарбайжон ўртасида яқинроқ ҳамкорлик зарурлигини аниқ кўради. Яна бир бор, ҳурматли Шавкат Миромонович, барчаси учун катта раҳмат”, деди Алиев.

Озарбайжон етакчиси ўз нутқида давлатлар раҳбарлари билан Тошкентдаги Ислом цивилизацияси марказига ташриф буюрганига тўхталди. Унинг урғулашича, Президент Мирзиёев ташаббуси билан ташкил этилган ушбу марказ унинг Ўзбекистоннинг бой маданий меросига бўлган садоқатининг яна бир далилидир.

“Баъзи мамлакатларда динимизга қарши ҳужумлар кучайиб, исломофобия тизимли тус олаётган бир пайтда, Ислом цивилизацияси марказининг очилиши бутун дунёга Исломнинг ижодкорлик, бағрикенглик, дўстлик ва биродарлик дини эканини намойиш этади. Ислом оламининг таниқли шахслари глобал илм-фан ва маданиятга улкан ҳисса қўшган ва Ислом цивилизацияси маркази буни яққол намойиш этади. Ишончим комилки, ўзининг ноёб кўргазмалари билан Тошкентдаги улуғвор Ислом цивилизацияси маркази бутун ислом олами учун фахр манбайи бўлади”, дейди Илҳом Алиев.

Озарбайжон Республикаси Марказий Осиё давлатлари раҳбарларининг Маслаҳат учрашувлари форматига тўла ҳуқуқли аъзо сифатида қабул қилинди.

Қирғизистон раҳбари Садир Жапаров учрашувда Ўзбекистонга доимо ўзгача туйғу билан келишини айтганди. Қозоғистон Президенти Қосим-Жомарт Тўқаев эса Президент Мирзиёевнинг Марказий Осиё давлатлари раҳбарларининг еттинчи Маслаҳат учрашувида берган барча таклифларини қўллаб-қувватлашини билдирди. 

Эслатиб ўтамиз, аввалроқ Шавкат Мирзиёевнинг таклифига биноан Марказий Осиё давлатлари раҳбарларининг еттинчи Маслаҳат учрашувида фахрий меҳмон сифатида иштирок этиш учун Илҳом Алиев амалий ташриф билан Тошкентга келгани ва Шавкат Мирзиёев билан учрашгани ҳақида хабар берилган эди.

Шунингдек, Марказий Осиё давлатлари раҳбарларининг еттинчи Маслаҳат учрашувида иштирок этиш учун Қозоғистон Республикаси Президенти Қосим-Жомарт Тўқаев, Қирғиз Республикаси Президенти Садир Жапаров ва Тожикистон Республикаси Президенти Имомали Раҳмон ҳам Тошкентга келган ва Шавкат Мирзиёев билан учрашув ва музокаралар ўтказганди. Улар Тошкентдаги Ислом цивилизацияси марказига ташриф буюрди ва “Келажак мероси” халқаро мукофоти совриндорларини тақдирлаш маросимида иштирок этди.

Бундан ташқари, Ўзбекистон Президенти Шавкат Мирзиёевнинг таклифига биноан бугун, 16 ноябрь куни Туркманистон Президенти Сердар Бердимуҳамедов давлат ташрифи билан Тошкентга келди. 

Президент Шавкат Мирзиёев Марказий Осиё давлатлари раҳбарларининг еттинчи Маслаҳат учрашувида бир қатор ташаббусларни илгари сурди.