Instagram вояга етмаганлар учун янги чекловлар жорий қилади

Instagram вояга етмаганлар учун янги чекловлар жорий қилмоқда. Унга кўра, эндиликда 18 ёшдан кичик фойдаланувчилар PG-13 рейтингига мос контентни кўради. Бу ҳақда “TechCrunch” хабар берди.

Қайд этилишича, ушбу рейтинг асосида болалар зўравонлик, уятсиз саҳналар ёки гиёҳванд моддалар мавзусини кўра олмайди. 18 ёшгача бўлган фойдаланувчилар бу созламани ота-она ёки васийларининг рухсатисиз ўзгартира олмайди.

Шунингдек, тармоқ “Чекланган контент” деб номланган янада қатъий фильтрни жорий қилмоқда. У ўсмирларга ушбу турдаги постларни кўришга ёки изоҳ ёзишга йўл қўймайди. Компанияниг маълум қилишича, келаси йилдан бошлаб ёшлар сунъий интеллект асосидаги ботлар билан мулоқот қилганда ҳам “Чекланган контент” фильтри татбиқ этиладиган янада қатъий чекловлар жорий этилади. Instagram аллақачон PG-13 контент созламаларини AI билан суҳбатларга ҳам қўллай бошлаган.

Бундан ташқари, Instagram ўсмирларга ёши учун мос бўлмаган контент жойлайдиган аккаунтларга обуна бўлишга рухсат бермайди. Агар улар шундай аккаунтларга обуна бўлса, бу аккаунтларнинг постларини кўра олмайди ва улар билан ўзаро алоқада бўла олмайди. Компания бундай аккаунтларни тавсиялар рўйхатидан ҳам олиб ташлайди, бу эса уларни топишни қийинлаштиради. Янгиланишлар ҳозирча АҚШ, Буюк Британия, Австралия ва Канадада жорий этилмоқда, келаси йилда эса бутун дунё бўйлаб татбиқ этилади.

Эслатиб ўтамиз, аввалроқ Instagram энг кутилган функциялардан бирини тақдим этиши, хусусан, энди профилдаги постларнинг ўрнини алмаштириш мумкин бўлиши мумкинлиги ҳақида хабар берилган эди.