Исроил жамоаси мухлисларига “Вилла Парк”га бориш тақиқланди

Англиянинг “Астон Вилла” клуби хавфсизлик нуқтаи назаридан Исроилнинг “Маккаби Тель-Авив” жамоаси мухлисларига ноябрь ойида бўлиб ўтадиган UEFA Европа Лигаси учрашувига ташриф буюришни тақиқлади. Бу ҳақда “Reuters” нашри хабар берди.

Хавфсизлик бўйича маслаҳат гуруҳи (SAG) кўрсатмасига кўра, “Астон Вилла” клуби жорий йилнинг 6 ноябрь куни “Вилла Парк” стадионида бўлиб ўтадиган ўйинга меҳмон жамоа тарафдорлари киритилмаслигини маълум қилди.

SAG  “Вилла Парк”да ўтказиладиган ҳар бир учрашув учун хавфсизлик сертификатларини беришга масъул орган. Баёнотда қайд этилишича, SAG расмий равишда клуб ва UEFA'га хат юбориб, “меҳмон мухлисларга ўйинни стадионда томоша қилишга рухсат этилмасин” деган тавсия берган.

Ғарбий Мидленд полицияси “стадион атрофида жамоат хавфсизлиги билан боғлиқ муаммолар мавжудлиги ва тунда юзага келиши мумкин бўлган норозиликларни бартараф этиш имконияти чекланганини” билдирган. “Астон Вилла” вакиллари эса Исроил клуби ҳамда маҳаллий ҳокимият билан “мухлислар хавфсизлиги ва жамоат тартибини таъминлаш” юзасидан доимий алоқада эканини таъкидлади.

Маҳаллий полиция ушбу ўйинни “юқори хавфли” тадбир сифатида баҳолаганини маълум қилган. 

“Бу қарор жорий кузатув маълумотлари ва олдинги воқеалар, жумладан, Амстердамда ўтган “Аякс” – “Маккаби Тель-Авив” ўйини чоғида содир бўлган тўқнашувлар ҳамда нафратга асосланган жиноятларга таянади”, дейилади полиция баёнотида.

Маълумот учун, 2024 йилнинг 8 ноябрь куни Амстердамда “Аякс” ва “Маккаби Тель-Авив” учрашуви атрофида тартибсизликлар юз берган. Исроил жамоаси тарафдорлари ҳужумга учраган эди.