Италия кетма-кет учинчи бор Девис Кубогини қўлга киритди

Кеча, 23 ноябрь куни Италия терма жамоаси Болоньяда ўтказилган финалда Испанияни мағлуб этиб, кетма-кет учинчи бор Девис Кубоги ғолибига айланди. Маттео Берреттини ва Флавио Коболлининг ажойиб ўйини мезбонларга тарихий муваффақият келтирди.

Дастлабки баҳсда Маттео Берреттини испаниялик Пабло Карреньо Бустани 6:3, 6:4 ҳисобида енгиб, Италиянинг ғалабага бўлган йўлини очди. 29 ёшли теннисчи 13 та эйс қайд этиб, бор-йўғи 79 дақиқада зафарга эришди. Берреттини Девис Кубогида сўнгги 12 ўйинида ғалаба қозониб келмоқда.

Иккинчи баҳсда Флавио Коболли сенсацион тарзда ўзини кўрсатди. У Хауме Мунарга қарши илк саккиз ўйиндан еттитасини бой берганига қарамай, уч сетлик курашда 1:6, 7:6(5), 7:5 ҳисобида ғалаба қозонди.

Италия 2023 ва 2024 йилларда Малагада ўтказилган финалларда ҳам зафар қучган эди. Энди эса улар Девис Кубогида кетма-кет уч марта чемпион бўлган илк Европа давлати сифатида тарихга кирди. Бунга қадар фақат АҚШ (1968–1972) бундай натижага эришган эди.

Испания эса 2019 йилда қўлга киритган сўнгги чемпионликдан кейин илк бор финалга чиқди. Финал йўлида испанлар Чехия ва Германияни мағлуб этди, бироқ якуний босқичда Италия тўсиғидан ўта олмади.

Маълумот учун, Италия бир мавсумда Девис Кубоги ва Билли Жин Кинг Кубогини қўлга киритган Қўшма Штатлар ва Австралиядан кейин тарихдаги учинчи давлатга айланди.