Италиялик спортчилар ўғрилик учун дисквалификация қилинди

Кеча, 9 октябрь куни Италия сузиш федерацияси (FIN) икки сузувчи Бенедетта Пилато ва Чиара Тарантинони 90 кунга дисквалификация қилди. Спортчилар Сингапурда косметик маҳсулотлар ўғирлагани учун спортдан вақтинча четлатилди. Бу ҳақда “Rаi news” нашри хабар берди.

Федерация баёнотида айтилишича, спортчилар жорий йилнинг 14 август куни Сингапур аэропортида косметик маҳсулотлар ўғирланиши билан боғлиқ иш бўйича ўз айбларини тан олганидан сўнг, тергов якунланиб, иш расмий равишда ёпилган.

Италия сузиш федерацияси ушбу қарорни Италия миллий олимпия қўмитаси ва Бош прокурорининг розилиги билан, томонлар тақдим этган келишув сўровига биноан қабул қилган. Тергов давомида аниқланган ҳолатлар инобатга олиниб, иккала спортчининг ижтимоий ва федерал фаолиятини 90 кунга тўхтатиш санкцияси кучга киритилди.

Маълум бўлишича, Пилато ва Тарантино 14 август куни жаҳон чемпионатидан кейин таътилдан қайтаётганида Сингапур аэропортида ўғирликда гумонланиб тўхтатилган, бироқ Италия элчихонасининг аралашуви натижасида озод қилинган. Маҳаллий ОАВ хабарларига кўра, кузатув камерасида улардан бирини дўкондан ўғирланган нарсаларни сумкага солаётган видеолар қайд этилган.

Маълумот учун, дисквалификация туфайли Бенедетта Пилато ва Чиара Тарантино жорий йилнинг 2-7 декабрь кунлари Полmшада бўлиб ўтадиган Европа чемпионатида иштирок эта олмайди.

Эслатиб ўтамиз, аввалроқ Биатлон бўйича 10 карра жаҳон чемпиони – франциялик спортчи Жюля Симон фирибгарлик ва ўғриликда айбланаётганлиги ҳақида хабар берилган эди.