Қайнонасини ўлдириб, жасадини чамадонга жойлаган куёв қўлга олинди

Жанубий Кореянинг Дэгу шаҳрида даҳшатли жиноят содир бўлди – куёв қайнонасини ўлдириб, хотини билан бирга жасадни чамадонга солиб дарёга ташлади. Бу ҳақда РEН ТВ хабар берди.

Маълумотларга кўра, 50 ёшли аёл қизи ва куёви билан яшаш учун уларнинг уйига кўчиб келган. 20 ёшли куёв эса қайнонасини ёқтирмай, бир неча ой давомида уни мунтазам равишда калтаклаб келган.

Охир-оқибат, аёлнинг шовқинли ва тартибсиз хулқини баҳона қилиб, куёв уни икки соатдан ортиқ уриб, тепиб қийнаган ва аёл кўплаб жароҳатлар олиб, вафот этган.

Шундан сўнг, эркак жасадни чамадонга жойлаб, кўча бўйлаб судраб борган ва дарёга улоқтирган. Бу жараёнда унинг хотини ҳам ёнида бўлган.

Жасад топилгач, полиция тергов бошлаган ва эр-хотин қўлга олинган. Эркак жиноятини тан олган.

Эслатиб ўтамиз, жорий йилнинг 24 январь куни Истанбулнинг Шишли тумани Куюлубоғ кўчасидаги чиқинди қутисидан 37 яшар ўзбекистонлик Дурдона Ҳакимованинг бўлакланган жасади топилганди. 

Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли чамадон билан келгани, кейин яна чамадон билан пиёда кўчадан чиқиб кетгани, гумонланувчилар чамадонни ҳодиса жойига яқин бўлган Бозкурт кўчаси томон ташлаб кетгани аниқланган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган.