Қозоғистонда Хитой байроғи ва Си Цзиньпиннинг сурати ёқиб юборилди (видео)

Қозоғистоннинг Олмаота вилоятининг Уйғур туманида 30 га яқин киши Хитой байроғи ва Хитой етакчиси Си Цзиньпин портретини ёқиб юборган норозилик намойишини ўтказди. Бу ҳақда “Orda.kz” хабар берди.

Намойишчилар Қозоғистон фуқароси Алимнур Турғанбойнинг Хитойда ҳибсга олинишига қарши чиқди.

“Алимнур Хитойда тўрт ойдан бери ҳибсда сақланмоқда. Ўшандан бери Хитой ҳеч қандай аниқ жавоб қайтармади. Алимнур Қозоғистон фуқароси. Мен уни қўйиб юбормагунча қаршилигимни тўхтатмайман”, дея намойишчилардан бирининг сўзларини келтиради нашр.

“У ҳеч қандай сабабсиз ҳибсга олинган. Хитойликлар биродарларимизни лагерда ушлаб турибди”, дейди яна бир киши.

Намойиш чоғида одамлар қозоқ ва хитой тилларида аҳолига мурожаат қилган, шундан сўнг улар Хитой байроғи ва Хитой раҳбари портретини ёқиб юборган. Воқеа жойига полиция етиб борган ва намойишчиларни ҳибсга олган.

Кейинроқ Олмаота вилояти полиция департаменти матбуот хизмати рухсат этилмаган намойишнинг 12 иштирокчиси 15 кунгача ҳибсга олингани ҳақида хабар берди. Уларга нисбатан Маъмурий жавобгарлик тўғрисидаги кодекснинг 434-моддаси (майда безорилик) билан жиноят иши қўзғатилган. Яна олти нафари тахминан 150 доллар миқдорида жаримага тортилган. Нафрат қўзғаш учун алоҳида жиноят иши очилган.

Полиция давлат рамзларига низо қўзғатувчи ҳужумлар қўпол қонун бузилиши эканини эслатди.

Алимнур Турғанбой асли Шинжондаги Или қозоқ мухтор префектурасидан (Хитой шимоли-ғарбида жойлашган). У 2017 йилда Қозоғистон фуқаролигини олган, ўтган йилнинг ёзида у Хитой чегарачилари томонидан қўлга олинган ва шундан бери қариндошлари билан алоқада бўлмаган. Август ойида Турғанбойнинг рафиқаси ва қизи Олмаота шаҳар маъмурияти биноси олдида Президент Қосим-Жомарт Тўқаевга видеомурожаат йўллаганди. Улар Турғанбойни Қозоғистонга қайтаришда ёрдам сўраганди.

Республика расмийларига кўра, эркакнинг ҳибсга олиниши унинг икки фуқаролиги билан боғлиқ бўлиши мумкин, бироқ Турғанбойнинг оиласи у Хитой фуқаролигидан расман воз кечганини даъво қилмоқда. Унинг қариндошлари Хитой консуллиги ва Ташқи ишлар вазирлиги биноси олдида бир неча бор норозилик намойишлари ўтказган, улар бу учун ҳибсга олинган ва жаримага тортилган.