“Камп Ноу” қурилишида 79 нафар ноқонуний ишчи аниқланди

Каталония Меҳнат инспекцияси “Барселона” жамоасининг уй стадиони “Камп Ноу” реконструкция лойиҳасида 79 нафар ноқонуний ишчини аниқлади. Шу сабабли, қурувчи Extreme Works компаниясига 1 миллион евро жарима қўлланилди. Бу ҳақда Cadena SER нашри хабар берди.

Манбага кўра, текширув жорий йилнинг сентябрь ойида CCOO касаба уюшмасининг мурожаатидан сўнг бошланган. Уюшма Extreme Works компаниясини Туркиядан ҳужжатсиз ишчиларни олиб келиб ишлатганликда, уларга тўлиқ маош тўламаганликда ва норозилик билдирган ходимларни ишдан бўшатганликда айблаган. Меҳнат инспекторлари айрим ишчилар бир неча ой давомида яшаш ва иш рухсатисиз меҳнат қилганини аниқлади.

“Барcелона” клуби воқеа юзасидан баёнот бериб, ўз объектларида ишлаётган барча шахсларнинг меҳнат ҳуқуқлари ва қадр-қимматини ҳурмат қилиш клубнинг қатъий талаби эканини билдирди. Клуб тегишли органлардан барча маълумотларни сўраб, ҳолатни ўрганаётганини қўшимча қилган.

Жорий йилнинг июнь ойида бир гуруҳ туркиялик ишчилар компанияга мурожаат қилган. Уларни Европа Иттифоқидаги Венгрия ва Литва давлатларидан гўёки рухсатномалари бор тарзда ёллашган. Аслида эса уларга ҳуқуқий мақом берилиши фақат ваъда қилинган. Ишчиларнинг кўпчилиги испанча ёки каталончани билмайди, инглиз тилини ҳам билмайди. Улар ҳозирда бир ойлик ва яна 19 кунлик маошни ололмаган.

CCOO маълумотига кўра, ишчилар расмий маоши 2000–2500 евро бўлишига қарамай, улар бу пул миқдорини ойига 340 соатгача ишлаш орқали топишган. Бу белгиланган меҳнат меъёридан икки баравар кўп ҳисобланади.

Маълумот учун, “Барселона” жамоаси икки йилдан ортиқ танаффусдан сўнг жорий йилнинг 22 ноябрь куни Ла Лига доирасида “Атлетик Билбао”га қарши учрашувни ўзининг қайта қурилган “Камп Ноу” стадионида ўтказган эди.

Эслатиб ўтамиз, аввалроқ UEFA “Барселона”га Чемпионлар лигаси доирасидаги “Айнтрахт Франкфурт” билан ўйинни “Камп Ноу”да ўтказиш учун рухсат берган эди.