Келишилган ўйинларда қатнашган теннисчи 20 йилга дисквалификация қилинди

Кеча, 11 декабрь куни Халқаро теннис яхлитлиги агентлиги (ITIA) француз теннисчиси Квентин Фоллиотга тенниснинг коррупцияга қарши дастурини 27 марта бузганлик айби қўйилгани ва у 20 йилга дисквалификация қилинганини маълум қилди. Бу ҳақда ташкилот матбуот хизмати хабар берди.

Тергов натижаларига кўра, Фоллиот келишилган ўйинлар билан шуғулланувчи синдикат номидан ҳаракат қиладиган ўйинчилар тармоғида марказий шахс бўлган ва шу сабабли санкцияга учраган олтинчи ўйинчи сифатида қайд этилган.

Профессионал теннисчилар ассоциацияси (ATP) маълумотларига кўра, Фоллиотга тегишли энг юқори рейтинг 488-ўрин бўлиб, у яккалик ва жуфтлик баҳсларида жами 60 047 доллар мукофот пули қўлга киритган. Франциялик спортчи 2022-2024 йиллар оралиғидаги 11 та ўйинга доир 30 та айбловни рад этган бўлса-да, мустақил коррупцияга қарши кураш бўйича суд мажлиси ходими Амани Халифа 27 та айбловни тасдиқлаган. Халифанинг ёзма қарорида таъкидланишича, 26 ёшли Фоллиот “кенгроқ жиноий синдикат учун вектор бўлиб, бошқа ўйинчиларни фаол равишда ёллаган ва коррупцияни профессионал теннисга чуқурроқ сингдиришга уринган”.

Шунингдек, Фоллиот 2024 йил май ойида вақтинчалик четлатилган бўлиб, умумий ҳисобда спортчига 70 минг доллар жаримага жазоси ҳамда 44 минг доллардан ортиқ коррупция орқали олинган тўловларни қайтаришга мажбур қўйилди. Квентин Фоллиотнинг вақтинчалик дисквалификацияда ўтказган даври умумий муддатга қўшилган бўлиб, натижада унинг дисквалификацияси 2044 йил 16 майда якунланади. 

Эслатиб ўтамиз, аввалроқ Исроилда 17 ёшли футболчиси иккинчи марта шиддатли муштлашувга қўл урганлиги сабабли Исроил футбол ассоциацияси томонидан 99 йилга дисквалификация қилинган эди.