Хитой, Россия ва Эрон ҳарбий-денгиз машғулотларини бошлади

Бугун, 10 январь куни Хитой, Россия ва Эрон Жанубий Африка сувларида бир ҳафталик қўшма денгиз машқларини бошлади. Бу кемачилик ва денгиз иқтисодий фаолияти хавфсизлигини таъминлаш учун BRICS Plus операцияси деб номланди. Бу ҳақда “Reuters” хабар берди.

BRICS – бу дастлаб Бразилия, Россия, Ҳиндистон, Хитой ва Жанубий Африкани ўз ичига олган кенгаш. BRICS Plus эса АҚШ ва Ғарбнинг иқтисодий устунлигига қарши куч сифатида кўриладиган геосиёсий блокнинг яна олтита давлатни ўз ичига олган кенгайган гуруҳи саналади. Кенгайтирилган BRICS гуруҳига Миср, Индонезия, Саудия Арабистони, Эфиопия ва Бирлашган Араб Амирликлари ҳам киради.

Жанубий Африка Хитой ва Россия билан мунтазам равишда денгиз машқларини ўтказиб турса-да, бу АҚШ Президенти Дональд Трамп маъмурияти ва Хитой, Эрон, Жанубий Африка ва Бразилия каби бир қатор BRICS Plus мамлакатлари ўртасидаги кескинлик кучайган бир пайтда содир бўлди.

Жанубий Африка ҳарбийлари баёнотида айтилишича, ушбу ҳарбий машғулотлар “Тинчлик учун ирода 2026” деб номланган. Очилиш маросимига бошчилик қилган Хитой ҳарбий амалдорлари Бразилия, Миср ва Эфиопия кузатувчи сифатида иштирок этганини билдирган.

Қўшма операциялар бўйича вакил вазифасини бажарувчи подполковник Мфо Матебула бу АҚШга қарши сиёсий келишув эмаслигини ва ҳеч қайси давлатга ҳеч қандай душманлиги йўқлигини билдирган. Шунингдек, у Жанубий Африка ҳам вақти-вақти билан АҚШ денгиз флоти билан машқлар ўтказиб келганини қўшимча қилган.
 
Трамп BRICS давлатларини Америкага қарши сиёсат юритишда айблайди ва ўтган йилнинг январь ойида барча аъзоларни дунё бўйлаб мамлакатларга жорий қилаётган божларидан ташқари 10 фоиз савдо тарифини қўллаш билан таҳдид қилган.

Эслатиб ўтамиз, аввалроқ Хитой Тайвань қирғоқлари яқинидаги бешта сув ҳавзасида ва унинг атрофидаги ҳаво ҳудудида жанговар ўқлар билан ўтказиладиган “Фақатгина Миссия 2025” кенг кўламли ҳарбий машқларини бошлаган эди.