Xitoy, Rossiya va Eron harbiy-dengiz mashg‘ulotlarini boshladi

Bugun, 10 yanvar kuni Xitoy, Rossiya va Eron Janubiy Afrika suvlarida bir haftalik qo‘shma dengiz mashqlarini boshladi. Bu kemachilik va dengiz iqtisodiy faoliyati xavfsizligini ta’minlash uchun BRICS Plus operatsiyasi deb nomlandi. Bu haqda “Reuters” xabar berdi.

BRICS – bu dastlab Braziliya, Rossiya, Hindiston, Xitoy va Janubiy Afrikani o‘z ichiga olgan kengash. BRICS Plus esa AQSH va G‘arbning iqtisodiy ustunligiga qarshi kuch sifatida ko‘riladigan geosiyosiy blokning yana oltita davlatni o‘z ichiga olgan kengaygan guruhi sanaladi. Kengaytirilgan BRICS guruhiga Misr, Indoneziya, Saudiya Arabistoni, Efiopiya va Birlashgan Arab Amirliklari ham kiradi.

Janubiy Afrika Xitoy va Rossiya bilan muntazam ravishda dengiz mashqlarini o‘tkazib tursa-da, bu AQSH Prezidenti Donald Tramp ma’muriyati va Xitoy, Eron, Janubiy Afrika va Braziliya kabi bir qator BRICS Plus mamlakatlari o‘rtasidagi keskinlik kuchaygan bir paytda sodir bo‘ldi.

Janubiy Afrika harbiylari bayonotida aytilishicha, ushbu harbiy mashg‘ulotlar “Tinchlik uchun iroda 2026” deb nomlangan. Ochilish marosimiga boshchilik qilgan Xitoy harbiy amaldorlari Braziliya, Misr va Efiopiya kuzatuvchi sifatida ishtirok etganini bildirgan.

Qo‘shma operatsiyalar bo‘yicha vakil vazifasini bajaruvchi podpolkovnik Mfo Matebula bu AQSHga qarshi siyosiy kelishuv emasligini va hech qaysi davlatga hech qanday dushmanligi yo‘qligini bildirgan. Shuningdek, u Janubiy Afrika ham vaqti-vaqti bilan AQSH dengiz floti bilan mashqlar o‘tkazib kelganini qo‘shimcha qilgan.
 
Tramp BRICS davlatlarini Amerikaga qarshi siyosat yuritishda ayblaydi va o‘tgan yilning yanvar oyida barcha a’zolarni dunyo bo‘ylab mamlakatlarga joriy qilayotgan bojlaridan tashqari 10 foiz savdo tarifini qo‘llash bilan tahdid qilgan.

Eslatib o‘tamiz, avvalroq Xitoy Tayvan qirg‘oqlari yaqinidagi beshta suv havzasida va uning atrofidagi havo hududida jangovar o‘qlar bilan o‘tkaziladigan “Faqatgina Missiya 2025” keng ko‘lamli harbiy mashqlarini boshlagan edi.