Хитой Россиядан нефть импортининг қарийб ярмидан воз кечди

АҚШ санкциялари сабаб Хитой Россиядан нефть импортининг деярли 50 фоизини тўхтатди. Бу ҳақда “Bloomberg” хабар берди.

Нашрнинг ёзишича, Россия нефтидан воз кечганлар орасида нефтни қайта ишловчи йирик давлат компаниялари – Sinopec ва PetroChina Co., шунингдек, хусусий корхоналар ҳам бор.

Янги чекловлардан чўчиган бу корхоналар Shandong Yulong Petrochemical Co. компанияси Буюк Британия ва Европа Иттифоқи томонидан “қора рўйхат”га киритилгач, россиялик етказиб берувчилар билан ҳамкорликни тўхтатган.

Трейдерлар маълумотига кўра, бу ҳолат ESPO брендли премиум нефть нархининг кескин тушишига олиб келган.

Норвегиянинг Rystad Energy AS консалтинг компанияси баҳосига кўра, Хитой компанияларининг Россия нефтидан воз кечиши ва нархларнинг пасайиши кунига 400 минг баррель атрофидаги ҳажмга таъсир кўрсатмоқда. Бу Хитойнинг Россиядан импорт қилаётган умумий нефть ҳажмининг қарийб 45 фоизини ташкил этади. Шунингдек, Yulong компанияси ҳозир фақат Россиядан ёқилғи харид қилишга мажбур, чунки ғарбий етказиб берувчилар билан ҳамкорлик қилиш имконияти йўқ.

Қайд этиш жоиз, жорий йилнинг 22 октябрь куни АҚШ Президенти Дональд Трамп Кремль Украинадаги урушни тўхтатишдан бош тортганидан сўнг, Россиянинг икки энг йирик нефть компанияси – “Роснефть” ва “Лукойл”, шунингдек, уларнинг 34 та туташ тузилмаларига қарши санкциялар жорий этганди. АҚШ Молия вазирлиги санкция остидаги компаниялар билан операцияларни тугатиш учун бир ой муҳлат берган.
 
Эслатиб ўтамиз, аввалроқ Туркиянинг нефть қайта ишлаш заводлари АҚШ, Европа Иттифоқи ва Британиянинг Россия нефть саноатига қарши санкцияларидан кейин Ироқ ва Қозоғистондан кўпроқ нефть сотиб ола бошлагани ҳақида хабар берилганди.