Эрдўған ва Путин нималарни муҳокама қилди?

Аввалроқ, Россия ва Туркия Президентлари Владимир Путин ва Ражаб Тойиб Эрдўған Туркманистоннинг Ашхобод шаҳрида учрашгани ҳақида хабар берилган эди. Улар Европа Иттифоқининг Россия активлари бўйича “улкан фирибгарлик уюштиришга” бўлган интилишини ва Украина-Россия музокараларини муҳокама қилган. Бу ҳақида Россия Президентининг матбуот котиби Дмитрий Песков маълум қилди.

“Европаликларнинг Россия активлари билан улкан фирибгарлик қилиш истаги борлиги ҳақидаги фикрлар алмашилди. Президент бунга мос, ҳаммага яхши маълум бўлган баҳосини берди”, дейди Песков.

Унинг айтишича, сиёсатчилар Европа Иттифоқининг Россия активларини мусодара қилишга бўлган уринишлари Бреттон-Вудс келишуви асосида барпо этилган халқаро молиявий тизимнинг издан чиқишига олиб келишини қайд этган.

Ражаб Тойиб Эрдўған Владимир Путин билан ўтказган учрашувида Туркия ва Россия ўртасидаги икки томонлама муносабатлар, шунингдек Украина-Россия урушида кенг қамровли тинчлик саъй-ҳаракатлари муҳокама қилинганини, Туркия тинчлик ташаббусларини қўллаб-қувватлашини яна бир бор тасдиқлаганини маълум қилган.

Эрдўған, шунингдек, урушни тугатишга қаратилган музокара жараёнлари яқиндан кузатиб борилаётганини, Туркия барча форматларда учрашувларга мезбонлик қилишга тайёр эканини билдирган. Учрашувда Фаластин ва Сурия бўйича охирги вазият, шунингдек, Жанубий Кавказдаги тинчлик жараёни ҳам муҳокама қилинган.

Уларнинг учрашуви 40 дақиқа давом этган.

Маълумот учун, Бреттон-Вудс тизими – халқаро валюта муносабатлари ва савдо ҳисоб-китобларини ташкил этиш тизими бўлиб, 1944 йил 1-22 июль кунлари ўтган Бреттон-Вудс конференциясида жорий этилган. У “олтин стандарт”га асосланган молиявий тизимнинг ўрнини эгаллаган. Асосий жаҳон валютаси олтин билан боғланган АҚШ доллари бўлган. Ўша пайтда халқаро валюта-кредит ташкилотлари – Халқаро валюта жамғармаси (ХВЖ) ва Халқаро тикланиш ва тараққиёт банки, шунингдек, Жаҳон банки ташкил этилган.