Ходим бонус сабаб хўжайинини пичоқлаб ўлдирди

Японияда бир эркак йиллик бонус миқдоридан норози бўлгани сабабли ўз хўжайинини пичоқлаб ўлдирди. Бу ҳақда “The Japan Times” нашри хабар берди.

Полиция маълумотларига кўра, 45 ёшли гумондор Масаҳиро Яманака компанияда савдо менежери бўлиб ишлаган. У сўроқ чоғида жиноятни тан олиб, хўжайини Акиҳиро Кавашима билан муносабатлардан, хусусан,  йиллик бонус миқдоридан норози бўлганини билдирган.

Тергов маълумотларига кўра, Яманака жабрланувчининг квартирасига кириб, аввал унинг юзига инсектицид пуркаган, сўнгра сони ва бўйнига бир неча бор пичоқ урган.

Суд-тиббий экспертиза Кавашиманинг бўйин, қорин ва сон соҳаларида ўндан ортиқ пичоқ жароҳати борлигини аниқлаган. Шунингдек, унинг қўл бармоқларида ҳимоя жароҳатлари қайд этилган бўлиб, бу жабрланувчи қаршилик кўрсатишга уринганидан далолат беради. Квартиранинг бир нечта хоналарида, жумладан, ҳаммомда ҳам қон излари топилган. Терговчилар гумондор ҳужумдан сўнг қон изларини ювишга уринган, деган хулосага келган.

Полиция, шунингдек, Яманака жиноятдан олдин ва кейин кийимларини алмаштирган деб ҳисобламоқда. Хавфсизлик камераларида у уйидан қора кийимда чиқиб кетгани, жабрланувчи яшаган бинога оқ куртка ва бошқа пойабзалда киргани, сўнгра яна кийимини алмаштириб ҳудудни тарк этгани акс этган. Терговчиларга кўра, у квартира эшигини ичкарида қолган калит ёрдамида қулфлаб, калитни почта қутисига ташлаб кетган.