Конгода Эбола юқтирган беморлар шифохонадан қочиб кетди

Конго Демократик Республикасининг Монгбвалу шаҳрида Эбола безгагига чалинганлар даволанаётган шифохонадан камида 25 киши қочиб кетди. Қон кетиши кузатилаётган ва аҳволи ўта оғир бўлган бир бемор қочишга уриниш пайтида вафот этган. Бу ҳақда “Reuters” хабар берди.

Қайд этилишича, қочиш ҳолатлари икки босқичда содир бўлган. Жорий йилнинг 23 май куни вафот этган қариндошларининг жасадлари ўзларига берилмаётганидан норози бўлган маҳаллий аҳоли Монгбвалу шаҳри шифохонасидаги мобил госпиталга ўт қўйган. Шу куни 18 киши қочиб кетган. Улардан камида бирининг Эболага топширган тести ижобий (касаллик аниқланган) чиққан. Кейинчалик, 24 май куни содир бўлган янги ҳужум уринишлари пайтида яна етти нафар бемор қочишга муваффақ бўлган.

24 май ҳолатига кўра, Эбола билан касалланганликда гумон қилинаётганлар сони 900 нафардан ошиб кетди. Жаҳон соғлиқни сақлаш ташкилотининг баҳолашича, 220 киши касаллик қурбонига айланган. Эпидемия Конгонинг Итури провинциясида авж олган. Шунингдек, айрим касалланиш ҳолатлари Шимолий ва Жанубий Киву провинцияларида ҳам қайд этилган.

Эбола безгаги ҳақида нималар маълум?

Эбола инфекцияси – бу кам учрайдиган, аммо оғир кечувчи касаллик бўлиб, кўпинча инсонлар ўлимига олиб келади. Бу касалликнинг қўзғатувчилари филовируслар оиласининг Orthoebolavirus турига мансуб вируслардир. Бугунги кунда олтита ортоэболавирус маълум бўлиб, улардан учтаси безгакнинг кенг кўламли эпидемиясини келтириб чиқаришга қодир – булар Конгодаги дарё номи билан аталган Эбола вируси, Судан вируси ва Бундибуджио вирусидир.

КДРдаги ушбу эпидемияга Эболавируснинг Бундибуджио (BDBV) подтипи сабаб бўлган. Айни пайтда ушбу подтипга қарши тасдиқланган дори воситалари ёки вакциналар мавжуд эмас. Айнан шу сабабли ЖССТ Африкадаги янги Эбола эпидемиясини фавқулодда вазият деб эълон қилди.

Эболавирус инфекцияси инсонга касалланган ҳайвонларнинг, масалан, мевахўр кўршапалаклар, шимпанзелар, гориллалар, ўрмон антилопалари ёки дикобразларнинг қони, ажратмалари, аъзолари ёки бошқа тана суюқликлари билан яқин алоқада бўлганда юқиши мумкин. Вируснинг одамдан одамга юқиши эса, шикастланган тери ёки шиллиқ пардалар орқали, касалланган ёки вафот этган шахснинг қони ва физиологик суюқликлари билан тўғридан тўғри алоқа қилганда, шунингдек, ушбу суюқликлар билан зарарланган буюмлар ёки юзаларга тегганда содир бўлади.

ЖССТ маълумотларига кўра, Эбола билан касалланган беморларга тиббий ёрдам кўрсатган соғлиқни сақлаш ходимларининг зарарланиш ҳолатлари тез-тез учраб туради. Вирус инфекцияси, шунингдек, дафн маросимлари пайтида, агар маросим иштирокчилари зарарланган жасадга тўғридан тўғри тегишса ҳам юқиши мумкин.

Эслатиб ўтамиз, аввалроқ Конго Демократик Республикасининг шарқида Эбола вирусининг тарқалиш марказига айланган ҳудуддаги шифохона бўлимига ҳужум қилингани, ғазабланган оломон Эболадан вафот этгани тахмин қилинган йигитнинг жасадини олиб чиқишга рухсат берилмагач, изоляция чодирларига ўт қўйгани ҳақида хабар берилган эди.