Кореяда хакерлар 120 мингта камерани бузиб, интим видеоларни сотди

Жанубий Корея полицияси уйлар ва шифохоналардаги 120 мингта кузатув камерасига рухсатсиз кирганликда гумон қилинаётган тўрт нафар шахсни қўлга олди. Улар қўлга киритилган интим контентни хорижий сайтлар орқали сотган. Бу ҳақда кеча, 1 декабрь куни SBS хабар берди.

Қайд этилишича, видеоларни харид қилган уч киши ҳам ҳибсга олинган. Полиция видеолар жойланган сайтларнинг бирига киришни чеклашни сўраб, Корея Алоқа комиссиясига мурожаат қилган. Аҳолига уй камераларининг паролларини мунтазам ўзгартириб туриш тавсия этилган. Гумонланувчилардан бири А. исмли шахс бўлиб, у уй видеолари ҳисобидан тахминан 35 миллион вон ишлаб олган. Яна бир хакер 70 мингта камерани бузиб кирган ва 648 та видео тўплаган. Бунинг эвазига эса 18 миллион вон миқдорида криптовалютада даромад олган. Яна икки фигурант – кичик бизнес эгаси Д. ва Э. видеоларни шунчаки сақлаган, аммо тарқатмаган.

Улар, асосан, болалар ёки уй ҳайвонларини кузатиш учун ишлатиладиган ва ҳимояси суст бўлган камераларни бузиб кирган. Бундай камералар интернетга уланади, шунинг учун фойдаланувчилар смартфон орқали реал вақт режимида кузатиш имконига эга бўлади. Бузиб кирилган қурилмаларда “0000” ёки “ABCD” каби жуда оддий пароллар ўрнатилган бўлган. Ҳолат бўйича жиноят иши қўзғатилган. Тўрт нафар гумондорнинг учтаси ҳибсда сақланмоқда.

Эслатиб ўтамиз, аввалроқ сўнгги 12 ой ичида Германия иқтисодиёти маълумотлар ўғирланиши, саноат жосуслиги ва саботажлар оқибатида 289,2 миллиард евро зарар кўргани ҳақида хабар берилган эди.