Кубани ҳам босиб оламиз – Трамп

АҚШ Қуролли кучлари Эрон билан боғлиқ вазифалардан қайтгач, Куба устидан назорат ўрнатилади. Бу ҳақда кеча, 1 май куни АҚШ Президенти Дональд Трамп Флорида штатидаги тадбирда айтиб ўтди.

Унинг иддао қилишича, Куба ичида муаммолар мавжуд ва уларни ҳал қилиш учун АҚШ “кубаликларга қўлидан келганча ёрдам беради”.

“Эрон йўлидан қайтишда бизнинг катта кемаларимиздан бири эҳтимол дунёдаги энг катта авиаташувчи USS Abraham Lincoln қирғоқдан тахминан 100 ярд (тахминан 90 метр) узоқликда тўхтайди. Куба ҳукумати эса: “Катта раҳмат, биз таслим бўлдик”, дейишади”, деган АҚШ етакчиси.

Трамп бу сўзларни айтаётганида у ҳазил оҳангида гапираётгандек таассурот уйғонган, аудитория ҳам кулган.

АҚШ Президенти сўнгги ойларда мунтазам равишда Куба ҳукумати устидан турли чоралар кўриши мумкинлигини айтиб келмоқда.

Трампнинг бу баёнотлари АҚШ Кубага қарши санкцияларни кенгайтирган фармонни имзолаганидан кейин янгради.

Оқ уй эълон қилган фармонда Вашингтон “Кубани АҚШ миллий хавфсизлиги ва ташқи сиёсати учун жиддий таҳдид” деб ҳисоблашда давом этиши қайд этилган.

Эслатиб ўтамиз, аввалроқ АҚШ Давлат департаменти делегацияси Куба расмийлари билан музокаралар ўтказиш учун 10 йил ичида илк бор Гаванага ташриф буюргани ҳақида хабар берилганди.