Лукашенко боладек қувоняпти. Трамп унга ҳам таклиф юборди

АҚШ Президенти Дональд Трамп Беларусь резиденти Александр Лукашенкога республикага Ғазо секторини тартибга солиш учун “Тинчлик кенгаши” таъсисчиси бўлиш таклифи билан шахсий мурожаат йўллади. Бу ҳақда Беларусь Ташқи ишлар вазирлиги матбуот котиби Руслан Варанков маълум қилди. 

“Беларусь томони Америка Қўшма Штатлари Президенти жаноб Дональд Трампнинг Беларусь Республикаси Президенти Александр Григорьевич Лукашенкога шахсий мурожаатини олди. Беларуснинг мурожаатида Ғазодаги вазиятни тартибга солиш контекстида “Тинчлик кенгаши” – янги халқаро ташкилотнинг таъсисчиси бўлиш таклиф қилинган”, дейди ТИВ матбуот котиби.

Варанковнинг билдиришича, ушбу таклиф Лукашенкога етказилган ва у бунга ижобий муносабат билдирган. Беларусь “Тинчлик кенгаши” ишида иштирок этишга тайёр, чунки унинг мандати ва ваколатлари дастлаб ташаббусда эълон қилинганидан анча узоққа кенгаяди. Беларусь томонининг фикрича, бундай халқаро ташкилот халқаро можароларни ҳал қилишда фаол иштирок эта олади, бу эса охир-оқибат янги хавфсизлик архитектурасини шакллантиришга ёрдам беради. 

Матбуот котибининг таъкидлашича, Беларусь АҚШ уни барқарор дунё қуриш учун масъулиятни ўз зиммасига олишга ва келгуси авлодлар учун хавфсиз келажакка сармоя киритиш орқали бошқаларга ўрнак бўлишга тайёр давлат сифатида кўраётганини юқори баҳолайди. Варанковнинг қўшимча қилишича, таклиф Беларусь Президентининг шахсий хизматлари ва халқаро обрўси эътирофи сифатида ҳам баҳоланади. 

Аввалроқ, яна бир қатор давлатлар етакчилари АҚШдан ушбу орган таркибига кириш таклифи олгани хабар қилинганди. Кенгаш ишини 2025 йил октябрь ойида Исроил ва Фаластиннинг ҲАМАС радикал ҳаракати Миср, Қатар, АҚШ ва Туркия воситачилигида келишиб олган тинчлик режасининг иккинчи босқичида бошлаш кўзда тутилган. 

Дональд Трамп бугунгача ушбу Кенгашга Россия, Туркия, Ҳиндистон, Миср, Қозоғистон ва Ўзбекистон Президентларини таклиф қилгани ҳақида маълумотлар мавжуд.

Эслатиб ўтамиз, АҚШ Президенти Дональд Трамп жорий йил 16 январда Ғазо секторида "Тинчлик кенгаши" тузилишини эълон қилган эди. Ушбу тузилмани ташкил этиш Трампнинг Ғазо бўйича тинчлик режасининг бир қисми бўлиб, унда халқаро кучларни жойлаштириш ҳам назарда тутилган. Бирлашманинг ижроия қўмитаси таркибига АҚШ Давлат котиби Марко Рубио, Трампнинг махсус вакили Стив Уиткофф, Президентнинг куёви Жаред Кушнер ҳамда Буюк Британиянинг собиқ бош вазири Тони Блэр киради.

“Bloomberg” маълумотларига кўра, АҚШ Ғазо сектори бўйича халқаро Тинчлик кенгашида доимий ўрин олишни истаган давлатлардан камида 1 миллиард АҚШ доллари бадал киритишни сўрамоқда. Ижроия кенгашининг биринчи раиси Трампнинг ўзи бўлиб, ташкилот аъзолигига кимни қабул қилиш масаласини айнан у ҳал қилади. Тинчлик кенгашига аъзо бўлган ҳар бир давлат уч йилдан ортиқ бўлмаган муддатга тайинланади ва битта овозга эга бўлади. Кенгаш қарорлари кўпчилик овоз билан қабул қилинади, бироқ уларнинг барчаси раис – Трамп томонидан тасдиқланиши шарт.