Лувр музейи қўриқчиларидан бири жиноятчилар билан ҳамкорлик қилган – “The Telegraph”

Лувр музейининг хавфсизлик хизмати ходимларидан бири жиноят содир этилишидан олдин заргарлик буюмларини ўғирлаганлар билан алоқа қилган. Бу ҳақда “The Telegraph” нашри хабар берди.

Тергов маълумотларига кўра, жиноятчилар музейнинг хавфсизлик тизими ҳақида махфий ички маълумотларни олдиндан қўлга киритган ва шунинг учун улар ичкарига қандай киришни билган. Лувр ходимининг жиноятчилар билан алоқаси рақамли далиллар орқали тасдиқланган.

Париж прокурори Лор Бекко бу маълумотни тасдиқлаб, полиция Лувр ходимининг жиноятчиларга ёрдам бергани ҳақидаги версияни текшираётганини айтган.

“Биз барча эҳтимолларни ўрганмоқдамиз. Музей ичидан кимдир жиноятчиларга ёрдам берган бўлиши мумкинлиги версияси ҳам бошқа барча вариантлар қатори синчиклаб текширилади”, дейди у.

Маълумот учун, 19 октябрь куни иш вақти давомида ниқоб кийган жиноятчилар Луврга кириб, императорлик коллекциясига мансуб тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаган. Ўғриликдан етган зарар 88 миллион еврога баҳоланмоқда.

Бир ҳафта ўтиб Франция ОАВларининг хабар беришича, Луврдан заргарлик буюмларини ўғирлашда гумон қилинаётган тўрт кишидан икки нафари қўлга олинган. Улардан бири Париждаги Руасси – Шарль-де-Голль аэропортида, Жазоирга учадиган самолётга чиқиш пайтида ҳибсга олинган. Иккинчиси эса Сена-Сен-Дени департаментида қўлга олинган.

Париж прокуратураси гумондорларнинг қўлга олинганини тасдиқлади. Лор Бекко, шунингдек, полиция кузатув камераларидан фойдаланган ҳолда, жиноятчиларнинг икки скутердаги ҳаракат йўлини аниқлашга муваффақ бўлганини билдирди.