Маск дунёда 500 млрд долларга эга биринчи одамга айланди 

SpaceX асосчиси ва америкалик тадбиркор Илон Маск 500 млрд доллар бойликка эга тарихдаги илк одамга айланди. Бу ҳақда  “Forbes” хабар берди.

Маълумотларга кўра, Маскнинг бойлиги дастлаб ярим триллион долларга етган. Кейинчалик бу кўрсаткич 499,1 млрд долларгача пасайган бўлса ҳам, у ҳозирда Ларри Эллисондан 100 млрд доллардан ортиқ даромадга эга дунёдаги илк триллионерликка номзод бўлиб турибди.

Қайд этилишича, Маскнинг Tesla компанияси акциялари деярли 4 фоизга ошган ва унинг бойлигига тахминан 9,3 млрд доллар қўшилган. Маскнинг Tesla’даги 12 фоизлик улуши ҳозирда 191 млрд долларга тенг.

Tesla компанияси Маскнинг тарихдаги энг бой одам бўлишига сабабчи ягона компания эмас. Унинг 2002 йилда асос солинган ракета ишлаб чиқарувчи SpaceX компаниясининг ўтган йилнинг декабрь ойидаги 350 миллиард доллар даромади жорий йилнинг август ойида 400 млрд долларга етган. Маск SpaceX’нинг 168 млрд долларлик (42 фоиз) улушига эгалик қилади.

Шунингдек, тадбиркор ўзининг янги сунъий интеллект компанияси xAI’ни 2022 йилда сотиб олган Х ижтимоий тармоғи (собиқ Twitter) билан бирлаштиргандан сўнг, умумий компания 113 млрд долларга баҳоланган. Маск xAI Holdings компаниясининг 60 млрд долларлик (53 фоиз) улушига эгалик қилади.

Агар кўрсаткичлар шу суръатда давом этса, Маск 2033 йилнинг март ойига қадар дунёдаги биринчи триллионерга айланиши мумкин. Аммо Маскнинг сўзларига кўра, бу фақат пул билан боғлиқ эмас.

Қайд этиш жоиз, Илон Маск 2021 йилнинг январь ойида 190 млрд долларга яқин бойлиги билан биринчи марта дунёдаги энг бой одам сифатида қайд этилган. 2021 йилнинг ноябрида Маскнинг даромади 300 млрд долларга, 2024 йилнинг декабрида эса 400 млрд долларга етган.

Эслатиб ўтамиз, аввалроқ Tesla ва SpaceX асосчиси Илон Маскнинг ўрнини 393 млрд доллар даромадга эга Oracle асосчиси Ларри Эллисон эгаллаган эди.

Бунёд Келдибоев