Мбаппе Ла Лиганинг энг қиммат футболчисига айланди

Transfermarkt портали Испания Ла Лигаси футболчиларининг бозор қийматларини янгилади. Унга кўра, “Реал Мадрид” клуби футболчиси Киллиан Мбаппенинг нархи 20 миллион еврога юқорилаб, лиганинг энг қиммат футболчисига айланди.

Ихтисослаштирилган футбол сайти футболчиларнинг бозор қийматини янгилаганидан сўнг, Киллиан Мбаппенинг нархи 200 миллион евро дея баҳоланди ва бу кўрсаткич билан франциялик футболчи Ямаль билан бирга Лиганинг энг қиммат футболчисига бўлиб турибди. “Барселона”нинг 18 ёшли футболчиси Ламин Ямалнинг бозор қиймати ҳам 200 миллион евро дея баҳоланган. Ундан кейинги ўринларни  160 миллион евро билан “Реал Мадрид” футболчиси Жуд Беллингем ва 150 миллион евро билан Винисус Жуниор эгаллаб турибди. 

Transfermarkt’га кўра, ҳозирда “Реал Мадрид” жамоасининг бозор қиймати 1,38 млрд евро билан Ла Лиганинг энг қиммат жамоаси бўлиб турибди. Ундан кейинги ўринда эса 1,12 млрд евро билан “Барселона” жамоаси бормоқда.

Эслатиб ўтамиз, аввалроқ Transfermarkt портали Эрон Про лигаси футболчиларнинг бозор қийматларини янгилагандан сўнг Ўзбекистон миллий терма жамоаси ва “Персеполис” клуби футболчиси Остон Ўрунов Эрон чемпионатининг энг қиммат футболчисига айланган эди.