Месси 2026 йилги ЖЧда қатнашадими?

“Интер Майами” сардори Лионель Месси, агар соғлиғи имкон берса, 2026 йилда АҚШ, Канада ва Мексикада бўлиб ўтадиган FIFA Жаҳон чемпионатида Аргентина терма жамоасининг чемпионлик унвонини ҳимоя қилишни режалаштирмоқда. Бу ҳақда футболчи NBC News нашрига берган интервьюсида маълум қилди.

“Жаҳон чемпионатида ўйнаш ғайриоддий нарса. Мен у ерда бўлишни хоҳлайман. Агар ўзимни яхши ҳис қилсам, Жаҳон чемпионатида Аргентина терма жамоасининг муҳим қисми бўлишни истайман. “Интер Майами” билан мавсумолди машғулотларини бошлаганимда, ҳар куни ўзимни баҳолайман ва ҳақиқатан ҳам 100 фоиз ўйнай оламанми ёки йўқми, шуни кўраман. Жаҳон чемпионатида ғалаба қозониш бу менинг бутун ҳаётимдаги орзум эди. Бунга эришиш учун оилам, халқим ва Аргентина номидан курашганимни ҳеч қачон унутмайман”, дейди Месси.

Шунингдек, у яқинда “Интер Майами” жамоаси билан 2028 йил якунига қадар узайтирилган шартномаси ҳақида ҳам тўхталиб ўтган.

“Мен ҳар доим фаолиятимни давом эттириш қарорини ўзимни жисмоний ва руҳий жиҳатдан қандай ҳис қилаётганимга қараб қабул қилганман. Бу йил ўзимни жуда яхши ҳис қилдим. Майамида оилам билан яшашдан бахтиёрман, шу сабабли шартномани узайтириш қарори мен учун осон бўлди”, дейди Месси.

Эслатиб ўтамиз, аввалроқ аргентиналик ҳужумчи Лионель Месси “Интер Майами” клуби билан шартномасини узайтиргани ҳақида хабар берилган эди.