Meta Facebook’нинг салбий таъсири ҳақидаги тадқиқотни яширган – ОАВ

Meta Facebook’нинг руҳий саломатликка салбий таъсири борлигини исботловчи тадқиқотини яширган. Бу ҳақда “Reuters” хабар берди.

Қайд этилишича, Facebook ва Instagram’нинг эгаси бўлган компания ўз платформаларининг фойдаланувчиларга психологик зарар етказишини тасдиқловчи тадқиқотни тўхтатиб қўйган.

“Reuters” бу маълумотни АҚШдаги бир нечта округ мактаблари ва Meta ўртасидаги ижтимоий тармоқларнинг ўсмирларга зарар етказиши ҳақидаги суд жараёнида тақдим этилган ҳужжатларга таяниб сиздирган.

Ҳужжатларга кўра, Meta 2020 йилда “Project Mercury” номли тадқиқот лойиҳасини ташкил қилган. Унинг доирасида Facebook фойдаланувчиларига маълум муддат давомида тармоққа кирмаслик таклиф қилинган. Атиги бир ҳафта “офлайн” бўлган иштирокчилар “депрессия, хавотир, ёлғизлик ҳисси ва ижтимоий босимнинг камайганини” айтган. Кўп ўтмай тадқиқот тўхтатилган, бироқ унинг натижалари ҳеч қачон эълон қилинмаган. Meta вакили эса тадқиқот натижаларини яшириш ҳақидаги айбловларни рад этган. Унинг айтишича, лойиҳа методологик камчиликлар сабаб тўхтатилган.

Эслатиб ўтамиз, аввалроқ Instagram вояга етмаганлар учун янги чекловлар жорий қилаётгани ҳақида хабар берилган эди. Унга кўра, эндиликда 18 ёшдан кичик фойдаланувчилар PG-13 рейтингига мос, яъни 13 ёшдан кичиклар учун мўлжалланган контентни кўради.