Мигрантларнинг Францияга кириши тақиқланиши мумкин

Франция Адлия вазири Жеральд Дарманен мамлакат “интеграция ва ассимиляция соҳасида ўз имкониятлари чегарасига етганини” маълум қилди ва қонуний иммиграцияга уч йиллик мораторий жорий этишни таклиф қилди. Бу ҳақда у “Le Journal du Dimanche” газетасига берган интервьюсида сўз очди.

“Биз интеграция ва ассимиляция соҳасида ўз имкониятларимиз чегарасига етдик. Шу сабабли, мен энди қатъий ишонаман: биз иммиграциянинг ҳозирги кўринишига чек қўйишимиз керак. Айнан шу боис, мен қонуний иммиграцияга уч йиллик мораторий жорий этишни таклиф қиламан”, дейди вазир.

Унинг сўзларига кўра, мамлакатга кираётганларнинг сони, келиб чиқиши ва малакаси бўйича ижро этилиши мажбурий бўлган квоталарни белгилаш имкониятига эга бўлиш учун Конституцияга ўзгартириш киритиш зарур. Дарманен, шунингдек, ишлаш ҳуқуқини берувчи яшаш гувоҳномалари эндиликда оилани бирлаштириш ҳуқуқини автоматик тарзда бермаслиги кераклигини ёқлаб чиққан.

“Келинг, иммиграцияни тўхтатайлик, депортация қилиниши зарур бўлган шахсларни бадарға қилайлик. Бунда визалар берилишини депортация тўғрисидаги буйруқларнинг қабул қилинишига боғлиқ қилиб қўйишимиз керак ва мамлакатда аллақачон бўлиб турганларни ассимиляция қилиш устида ишлашни бошлайлик”, деди у ўз интервьюсида.

Дарманен, шунингдек, иш ҳақини пасайтириш учун миграциядан фойдаланадиган “жиловланмаган капитализмни рағбатлантириш”нинг олдини олиш зарурлигини қўшимча қилган. 

“Ҳозирги кунда кўплаб оғир ишлар хорижлик ишчилар учун банд қилиб қўйилган бўлиб, уларга жуда кам ҳақ тўланади ва инсофсиз иш берувчилар томонидан эксплуатация қилинади”, дейди у.

Янги баҳс-мунозаралар тўлқинига миграция бўйича сўнгги рақамлар сабаб бўлган. Дарманеннинг айтишича, 2025 йилда Франция 4,5 миллион дона яшаш ҳуқуқини берувчи ҳужжат берган бўлиб, бу ўтган йилга нисбатан 3,2 фоизга кўп дегани. Ҳар учинчи ҳужжат оилани бирлаштириш йўналиши бўйича расмийлаштирилган.