Мирзиёев АҚШга сафарини якунлади

Бугун, 7 ноябрь куни Ўзбекистон Президенти Шавкат Мирзиёевнинг Америка Қўшма Штатларига амалий ташрифининг тадбирларга бой дастури якунига етди. Бу ҳақда Ўзбекистон раҳбарининг матбуот хизмати хабар берди.

Давлат раҳбари Вашингтон шаҳридаги Оқ уйда Президент Дональд Трамп билан самарали музокаралар ўтказди ҳамда Марказий Осиё мамлакатлари ва АҚШ етакчиларининг С5+1 форматидаги саммитида иштирок этди.

Ўзбекистон – АҚШ стратегик шериклик муносабатларини янада ривожлантириш, С5+1 форматида Марказий Осиё ва АҚШ ўртасидаги ҳамкорликни чуқурлаштириш бўйича келишувларга эришилди.

Давлат раҳбари сенатор Стив Дэйнс, конгрессменлар Кэрол Миллер, Билл Хайзенга ва Сидни Камлагер-Дав билан ҳам учрашди.

Ўзбекистон Президенти АҚШ савдо вазири Ховард Латник, Эксимбанк президенти ва раиси Жон Йованович, Халқаро молиявий тараққиёт корпорацияси бош ижрочи директори Бен Блэк ҳамда “General Motors International” компаниясининг глобал ижрочи директори Шилпан Аминни қабул қилди.

Ташрифнинг ишбилармонлик дастури доирасида АҚШ ишбилармонлари иштирокида давра суҳбати ўтказилди.

Учрашув ҳамда музокаралар якунида қатор икки ва кўп томонлама ҳужжатлар қабул қилинди.

Ташриф тадбирлари якунлангач, Ўзбекистон Президенти Тошкент шаҳрига йўл олди.