Мирзиёев Инфантинони “Дўстлик” ордени билан мукофотлади

Бугун, 8 сентябрь куни Ўзбекистон Республикаси Президенти Шавкат Мирзиёев Халқаро футбол ассоциациялари федерацияси (FIFA) раҳбари Жанни Инфантинони қабул қилиб, унга Дўстлик” орденини топширди. Бу ҳақда Президент матбуот хизмати хабар берди.

Қайд этилишича, суҳбат аввалида FIFA президенти Ўзбекистон етакчиси ва халқини тарихий воқеа – миллий терма жамоа 2026 йилда АҚШда бўлиб ўтадиган футбол бўйича жаҳон чемпионатининг финал босқичига йўлланмани қўлга киритгани билан яна бир бор самимий табриклаган. Ушбу ҳақли ютуқ мамлакатда олиб борилаётган самарали ислоҳотлар, спортни ривожлантиришга қаратилаётган эътибор ва ҳар томонлама кўмакнинг амалий натижаси экани таъкидланган.

Ўзбекистоннинг ушбу нуфузли халқаро тузилма билан, энг аввало, футболни ташкил этиш ва бошқариш тизимини такомиллаштириш, ёш истеъдодларни юзага чиқаришга кўмаклашиш, мураббийлар, ҳакамлар, менежерлар, спорт шифокорлари ва техник мутахассисларни халқаро даражада тайёрлаш борасидаги сермаҳсул ҳамкорлигини янада кенгайтириш масалалари муҳокама қилинган.

“Футболни, биринчи навбатда, ёшлар ўртасида оммалаштириш бўйича қўшма дастурларни амалга оширишда яқиндан ҳамкорлик қилинаётгани катта мамнуният билан қайд этилди”, дейилади хабарда.

FIFA’нинг техник кўмагида замонавий Миллий футбол маркази, шу жумладан, инновацион ечимларни жорий этган ҳолда рақамли футбол бўйича ситуацион марказ ташкил этилди. Ўтган йили мамлакатда футзал бўйича Жаҳон чемпионати муваффақиятли ўтказилди.

Ўзбекистонда FIFA’нинг йирик мусобақалари ва тадбирларини ташкил этишга алоҳида эътибор қаратилди. 

Билдирилишича, Тошкент шаҳрида FIFA’нинг Марказий Осиё мамлакатлари учун минтақавий офисини очиш юзасидан келишувга эришилган.

Учрашув якунида Ўзбекистон Президенти ўзбек футболини ривожлантириш ва халқаро майдонда илгари суришга қўшган шахсий ҳиссаси учун FIFA раҳбари Жанни Инфантинога Ўзбекистоннинг юксак мукофоти – “Дўстлик” орденини топширган.

Эслатиб ўтамиз, аввалроқ Ўзбекистонга келган Жанни Инфантино бошчилигидаги FIFA делегацияси Ўзбекистон Республикаси спорт вазири Адҳам Икромов, Осиё Олимпия кенгаши вице-президенти, МОҚ раисининг биринчи ўринбосари Отабек Умаров, ЎФА биринчи вице-президенти Равшан Ирматов ҳамда бошқа расмийлар ҳамроҳлигида Тошкент шаҳрида барпо этилган Олимпия шаҳарчаси ва Тошкент вилоятининг Юқори Чирчиқ туманида қурилган Миллий футбол марказини кўздан кечиргани хабар қилинганди.